Салгыы
Куолас ааҕыытын түмүктүүр түһүмэҕэ

Куолас ааҕыытын түмүктүүр түһүмэҕэ

18.03.2024, 02:00
Сайаана Львова хаартыскаҕа түһэриитэ
Бөлөххө киир:

Кулун тутар 17 күнүгэр, Арассыыйа Бэрэсидьиэнин талыы быыбарын бүтэһик күнүгэр, Дьокуускай куорат 721 №дээх быыбардыыр учаастагын аана киэһэ 20:00 ч. лоп курдук сабылынна. Быыбардыыр учаастак бэрэссэдээтэлэ Ася Артемьева быыбар хамыыһыйатын чилиэннэригэр куолаһы ааҕыы бэрээдэгин билиһиннэрдэ.

Ол иннинэ быыбардыыр учаастак бэрэссэдээтэлэ Ася Артемьева кылгастык учаастак үлэтин туһунан кэпсээтэ:

«Бу үс күн биһиги учаастакпытыгар куоластааһын көхтөөхтүк барда. Бастакы күн орто саастаах дьон үксүн кэлэн куоластаабыта, быйыл сокуоннай саастарын ситэн аан бастаан куоластааччы даҕаны элбэх. Кинилэри барыларын эҕэрдэлээн туран, өйдөбүнньүк бэлэх туттарбыппыт. Быйыл үгүс киһи дьиэ кэргэнинэн күргүөмүнэн, ону кытары 77 сыл бииргэ олорбут кэргэнниилэр кытары тутуспутунан кэлэн куоластаатылар. Быйылгы быыбарга дьон аһара көхтөөх уонна настарыанньалара өрө көтөҕүллэн кэлэрин бэлиэтиэхпин баҕарабын. Испииһэгинэн биһиэхэ 1990 быыбардааччылаах этибит, онтон түмүктүүр күн 19:00 чааһыгар 1542 киһи куоластаабыта. Биһиги учаастакпыт куоракка улаханнартан биирдэстэрэ, 16 чилиэннээхпит. Икки киһи КОИБ операторыгар анал үөрэҕи ааспыттара. Быыбар иннинэ биэс учаастактааҕы быыбардыыр хамыыһыйа биэс чилиэнэ «ИнформУИК» бырагырааманан ыаллары кэрийэн иһитиннэриини оҥорбуттара. Мин саныахпар, бу бырагыраама сабыдыалынан дьон көхтөөхтүк кытынна. Биһиэхэ быйыл дьиэлэригэр ыҥыран, сайаапканан 50-ча киһи куоластаата, бу хаһааҥҥытааҕар даҕаны элбэх киһи буолар. Ону таһынан үс киһи уопсастыбаннай кэтээн көрөөччү быһыытынан быыбар хаамыытын кэтээтилэр», — диэн бэрэссэдээтэл Ася Артемьева кэпсээтэ.

Куолаһы ааҕыыга, сокуон быһыытынан, быыбар учаастагар быыбар хамыыһыйатын чилиэннэрин сэргэ хандьыдаат кэтээн көрөөччүтэ уонна маассабай иһитиннэрэр сириэстибэ үлэһитэ бааллар.

Салгыы быыбар хаамыытын кэтээн көрөөччүнү кытары кэпсэтэбин. Арассыыйа Бэрэсидьиэнин хандьыдаатын аатыттан Алена Замятина үс күнү быһа кэтээччинэн олорорун этэр. Кини быыбар үрдүк тэрээһиннээхтик ааһан эрэрин уонна бу үс күн туох да быһылаан, сокуону кэһии тахсыбатаҕын этэр. «Үс күн кэтээччи быһыытынан олордум. Быыбарга дьон көхтөөхтүк кытынна, бастакы күн орто саастаах дьон кыттыыта элбэх этэ. Үгүстэр дьиэ кэргэттэринээн бары кэлэн кыттыбыттары бэлиэтии көрдүм. Аҕам саастаахтар дьиэлэригэр ыҥыран куоластаатылар, онно эмиэ кэтээн көрөөччү быһыытынан барса сырыттым. Быйыл бу учаастакка саҥа быыбардааччы кэлэн кыттыбытын сэргии көрдүм. Бу учаастакка сокуону кэһии, иирсээн тахсыбата, барыта этэҥҥэ ааста диэн бэлиэтээн этиэхпин баҕарабын», — диэтэ Алена Замятина.

Аан бастаан учаастактааҕы быыбардыыр хамыыһыйа чилиэннэрэ туһаныллыбатах быыбардыыр бүлүтүөннэри аахтылар уонна буорту буолбут былааҥкалары дьиҥэ суоҕунан ааҕан, былааҥка хаҥас аллара муннугун быһа кырыйдылар. Ол кэннэ тус-туспа мөһөөччүккэ суулаан бэчээттээн туора уурдулар. Бу былааҥкалар инникитин куолас ааҕыытыгар учуоттамматтар, ону туспа бакыакка уганнар бэчээттииллэр.

КОИБ быыбардааччылар куоластарын электроннайдык ааҕар тэрили дьаһайарга анал үөрэҕи ааспыт эппиэттээх дьон саала ортотугар турбут остуолларга икки КОИБи аҕалан таҥнары сүөкүүллэр. Ол кэннэ учаастактааҕы быыбар хамыыһыйатын бары чилиэннэрэ саба түһэн тус-туспа куоластарга куоластарынан араартыыллар. Учаастактааҕы быыбардыыр хамыыһыйа куоластары ааҕыы кэнниттэн куоластааһыҥҥа төһө киһи кыттыбытын, быыбар учаастага куоластааһын иннинэ төһө бүлүтүөнү ылбытын, төһө киһиэхэ болдьох иннинэ куоластааһыҥҥа бэриллибитэ, быыбардыыр учаастак тас өттүгэр, дьиэҕэ куоластааһыҥҥа төһө бэриллибитэ, төһө бүлүтүөн быһа кырыллыбыа. Стационарнай дьааһыкка (КОИБ) төһө баара, төһө быыбардааччы куоластаабыта, о.д.а. барыта боротокуолга суруллар. Ол кэннэ хас биирдии учаастактааҕы быыбардыыр хамыыһыйа чилиэнэ икки боротокуолга илии баттыыр. Оттон боротокуол бастакы экземплярын территориятааҕы  быыбардыыр хамыыһыйаҕа ыыталлар, копияларын кэтээн көрөөччүлэргэ тарҕаталлар.

Дьэ ол кэннэ быраабы араҥаччылыыр уорганнар үлэһиттэрин арыаллатан учаастактааҕы быыбардыыр хамыыһыйа бэрэссэдээтэлэ бүлүтүөннэри сыа-сым курдук тутан территориятааҕы быыбардыыр учаастакка илдьэн туттарар. Учаастактааҕы быыбардыыр хамыыһыйа түмүк боротокуолун Дьокуускай куорат территориятааҕы быыбардыыр хамыыһыйата «Выборы» судаарыстыбаннай систиэмэҕэ киллэрэр.

Түмүктүүр иһитиннэриини СӨ Киин быыбардыыр хамыыһыйата сонуннары киэҥник тарҕатар сириэстибэлэр нөҥүө кулун тутар 18 күнүгэр, күнүс 12:00 ч. иһитиннэриэ.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
23 июля
  • 23°C
  • Ощущается: 23°Влажность: 64% Скорость ветра: 2 м/с

Сообщить об опечатке

Текст, который будет отправлен нашим редакторам: