Куомуннаһан тэрилтэ харчытын сиэбиттэр

Нерюнгри куорат борокуратуурата түөрт киһи холуобунай дьыалатынан буруйдуур түмүгү бигэргэттэ.

Кинилэр РФ холуобунай кодексатын 159  ыст.4 ч. (эрдэттэн куомуннаһан, дуоһунастарын туһанан элбэх суумалаах үбү сиэһиҥҥэ)  буруйданаллар. Силиэстийэ сабаҕалааһынынан, буруйданааччылар Нерюнгритааҕы көтөр фабрикатыгар экэнэмииһинэн уонна буҕаалтырынан үлэлии сылдьан куомуннаспыттар. 2021  сыл алтынньытыттан 2023 сыл олунньутугар диэри дуоһунастарын туһанан эбии харчы ылар сыалтан билэр дьоннорун, аймахтарын көтөр фабрикатыгар үлэһит быһыытынан киллэрбиттэр. Ол эрээри үлэ толоруллубатах. Хамнастара төлөнө турбут. Инньэ гынан тэрилтэҕэ  3,7  мөл. солкуобайдаах  хоромньу тахсыбыт.

Буруйданар түмүк бигэргэтиллибитин кэнниттэн холуобунай дьыала суут көрүүтүгэр ыытылынна. Хоромньуну буруйданааччылартан төннөрөр сыалтан кыбартыыралары, массыыналары былдьаатылар.