Куонкуруска номнуо 162 киинэ киирдэ

«Дальний Восток – Земля приключений» куонкурус үһүс сезонун үс ыйын түмүгүнэн, дьүүллүүр сүбэ сыанабылыгар 162 киинэ киирдэ, ол  2024 сылга тэҥнээтэххэ, 2,5 төгүл элбэх. Бу туһунан бырайыак көҕүлээччитэ, РФ бырабыыталыстыбатын бэрэссэдээтэлин солбуйааччы – Арассыыйа Бэрэсидьиэнин Уһук Илиҥҥэ боломуочуйалаах бэрэстэбиитэлэ  Юрий Трутнев иһитиннэрдэ.

«Биһиги сыалбыт – төһө кыалларынан элбэх Арассыыйа олохтоохторо Уһук Илиҥҥи уонна хотугу эрэгийиэннэр уратыларын, кэрэлэрин арыйалларын хааччыйыы. Ыраас айылҕа устун айан – олоххо сыһыаҥҥын уларытар, баҕа санааҥ, майгыҥ, санааҥ күүһүн уонна хамаандаҕа үлэлиир дьоҕургун бэрэбиэркэлиир дьиҥнээх мүлчүргэннээх сырыы. Онтон саамай кылаабынайа, киһи хайаан да бэйэтин кыаҕын хаттаан арыйар уонна кыайыыга дьулуһуута, олоххо традыһыыта күүһүрэр. Айанньыттар харахтарынан кинилэр арыйыыларын, уопуттарын, тулуурдарын уонна ситиһиилэрин көрөбүт. Айан кэмигэр уһуллубут киинэлэр көмөлөрүнэн, дойдубут үгүс олохтоохторо Уһук Илиҥҥэ уонна Арктикаҕа көтөргө былааннанан, бу көрбүт суолларынан хаамыахтарын, урут аахпыт сирдэрин бэйэлэрин харахтарынан көрүөхтэрин баҕарыахтара диэн эрэллээхпин», — диэтэ Юрий Трутнев.

Саамай элбэх сайабылыанньа “Сатыы айан” номинацияҕа киирдэ – 106 киинэ. “Уунан айан” номинацияҕа 29 видео үлэ, “Кыһыҥҥы айан” – 20, оттон “Арктикаҕа айан” – 7 киинэ киирдэ.

Куонкуруска киирбит киинэлэр ахсааннарынан Сахалин уобалаһа эрэгийиэннэр ортолоругар инники күөҥҥэ сылдьар – 68 видео үлэ. Иккис миэстэҕэ Хабаровскай кыраай – 36 киинэ, Амур уобалаһа уонна Камчатка кыраайа – 13 уонна 12 киинэ. Ону таһынан, Приморскай кыраайга уһуллубут 8 уонна Еврейскай автономнай уобаласка 6 үлэ дьүүллүүр сүбэ сыанабылыгар киирдилэр. Мурманскай уобалаһынан, Бурятиянан уонна Саха сиринэн айан туһунан түөртүү киинэ киирдэ, Забайкальскай кыраайга – үс видео үлэ, Красноярскай кыраайга – икки киинэ, биирдии киинэ – Чукотка уонна Ненецкэй автономнай уокуруктарга.

Куонкуруска анаан үлэлэри үксэ Уһук Илиҥҥи эрэгийиэннэр олохтоохторо ыыппыт буоллахтарына, киин сирдэртэн сэттэ кыттааччы баар.

«Дальний Восток – Земля приключений» Бүтүн Арассыыйатааҕы бастыҥ айан куонкурус III сезонугар кыттар туһугар, Уһук Илиҥҥэ эбэтэр Арктикаҕа сырыыҥ туһунан 8 мүнүүтэҕэ диэри уһуннаах кылгас киинэ устан, путшественникдв.рф  саайт нөҥүө 2026 сыл тохсунньу 15 күнүгэр диэри ыытыахтааххын. Маны таһынан, икки анал номинация олохтонно: «Кыайыы суоллара» уонна «Чукоткаҕа бастыҥ айан». Бастыҥ видеоҕа сүрүн бириис – 3 мөлүйүөн солкуобай.

Сиһилии: https://www.sakha.gov.ru/news/9620