Куоракка 17 уонна 18 саастаах наркотиктаах сылдьар эдэр дьону туппуттар

ИДьМ наркотигынан эргиниини хонтуруоллуур управление суһал үлэһиттэрэ эрэгийиэннээҕи Росгвардия анал суһал этэрээтин байыастарын көмөлөрүнэн, наркотик атыытынан дьарыктанар Дьокуускай куорат 16-21 саастаах сэттэ олохтооҕун булбуттар.

Суһал-көрдүүр үлэ түмүгэр эдэр дьону Ф. Попов уонна Дзержинскэй аатынан уулуссалартан туппуттар. 17 уонна 18 саастаахтары дьэҥдьийэн көрүү түмүгэр бэйэлэрин кытта бириэстэммит хараҥа өҥнөөх бэссэстибэни илдьэ сылдьалларын булбуттар. Чинчийии быһаарбытынан, былдьаммыт бэссэстибэ гашиш наркотик буолара биллибит.

Полиция үлэһиттэрэ салгыы куорат киинигэр баар кистиир сирдэриттэн хас даҕаны сууну булан эспэртииһэҕэ ыыппыттар.

Уорбаланааччыларга Холуобунай кодекс 30 ыст. 3 ч. — 228.1 ыст. 3 ч. холуобунай дьыала тэриллибит.

Бу туһунан ИДьМ пресс-сулууспата телеграм-ханаалыгар суруйар.