Олоҥхо ыһыаҕар саха таҥаһын күрэһин олус интэриэһиргээн, умсугуйан көрө олорор дьахтары кытта кэпсэттим. Алена — Нерюнгри куорат төрүт олохтооҕо. Кини ыһыах туһунан санаатын үллэһиннэ.
— Биһиги кыра куораппытыгар чуумпутук, бэйэбит эйгэбитигэр булкуһан олорбуппут. Туох эрэ тутуу ыытыллар, бэлэмнэнии буолар диэн истэр этим.
Дьэ, онтон куораппыт биирдэ үллэҥнэс киһи буола түстэ, кэлии-барыы, сүпсүлгэн. Икки тыһыынчаттан тахса киһини ханна батарбыттарын, хайдах аһаталларын өйүм хоппот.
Бэҕэһээ үлэм кэннэ этнокомплекска кэлэн көрөн баран, бэл, тылбыттан маттым. Эчи, тута охсубуттара түргэнин! Олус кэрэ тутуулары туппуттар, арааһа, архитектор анаан үлэлээбит. Сүрүнэ, бу барыта биһиэхэ хаалан, култуураны, туризмы сайыннарыа буоллаҕа. Күүлэйдииргэ да бэртээхэй.
Наһаа кыраһыабай таҥастары, симэхтэри көрөн, дуоһуйдум даҕаны. Бу барыта илии үлэтэ. Сөҕүмэр! Бары үөрэ-көтө сылдьаллар, өрө көтөҕүллүү, бырааһынньык тыына биллэр. Атын норуоттар култуураларын, үгэстэрин билсэр наһаа интэриэһинэй.
Бэҕэһээ ыһыах аһыллыытын эрэпэтииссийэтин көрбүтүм, сөхпүтүм-махтайбытым, бэйэбит оҕолорбутун маассабайдык кытыннарбыттар, киэһэ ахсын дьиэлэргэ ыһыах туһунан кэпсэтии буолла. Онон бүгүн анаан кэллим, хойукка диэри сылдьыам. Хомойуох иһин, сарсын үлэлиибин, онон кэлэр кыаллыбат.
Биһиэхэ маннык улахан, өрөспүүбүлүкэ таһымнаах бырааһынньыктар хаһан да буола иликтэр. Сыл аайы да буолара буоллар, сириэ суох этибит. Олус сэргэхситтигит, — диэн кэпсээтэ.
Олоҥхо ыһыаҕар олохтоохтор хото кэлэн, кытыннылар, көрдүлэр-иһиттилэр. »С праздником!» диэн көрсө түһээт, бэйэ-бэйэлэрин эҕэрдэлэһэллэр. Нуучча кыргыттара, дьахталлара сыанатын аахсыбакка, сахалыы таҥнан, симэхтэри кэтэн сылдьаллара көрүөххэ астык. Бүтүн дьиэ кэргэнинэн таҥныбыттар да бааллар. Оһуохайга киирэн, эргийсэллэр. Саха, эбэҥки култуураларын интэриэһиргииллэр.
»Самоцветы Якутии» диэн бырайыагынан таҥнан-симэнэн тахсан, ыалдьыттары кытта анаан хаартыскаҕа түсүһэр кыргыттар, уолаттар бааллар. Ким баҕарар түсүһүөн сөп. Онон наһаа киэргэттилэр.
Дьэ, чахчы, Нерюнгригэ өтөрүнэн буолбатах улахан, норуоттар доҕордоһууларын, түмсүү, ил бырааһынньыга буола турар.
Билиҥҥи кэмҥэ волонтердар көмөлөрө олус улахан суолталаах. Тыһыынчанан волонтердар түмсэн байыаннай дьайыы кыттыылаахтарын өйүүллэр. Бүгүн…
Бу күннэргэ Дьокуускайга бэйэ дьыалатын социальнай хантараак нөҥүө тэриммит дьоҥҥо олус туһалаах тэрээһин буолан ааста.…
Сунтаарга бу өрөбүл күннэргэ хапсаҕайы таптааччыларга улахан үөрүү. Сыллата ыытыллар Бордоҥтон төрүттээх хапсаҕайга спорт маастара…
Неонатолог быраастар кэмин иннинэ күн сирин көрбүт кырачааннар олохторун быыһыырга сүрүн оруолу ылаллар. Кинилэртэн биирдэстэрэ…
— Өскөтүн иккилээх оҕом сайдыытыгар хаалыылаах дии санаатахпына, ханна баран сүбэ-ама ылыахпын сөбүй? Саастыылаахтарын кытта тэҥнээн…
Халлаан сылыйан оҕолор кыралаан былаһааккаларга оонньуур, салгын сиир буоллулар. Хаар ууллуута уһун кыһын устата тоҥон…