Куорат хоту өттө аныгы поликлиникаланна

Соторутааҕыта Дьокуускай куоракка ханна да суох улахан уонна аныгы тутуулаах СМАРТ-поликлиника Гагарин уокуругар аһылынна.  Саҥа поликлиника мэдиссиинэ бастакы көмөтүн улахан технологическай киининэн буолла.

Биэс мэндиэмэннээх саҥа дьиэ 8,8 тыһыынча кв. м уопсай иэннээх, симиэнэҕэ 600 киһи сылдьар кыахтаах. Эбийиэк эрэгийиэн бырабыыталыстыбатын уонна “ВИС” бөлөх судаарыстыбаннай-чааһынай бииргэ үлэлээһиннэринэн Саха сирин уратыларын уонна килиимэтин усулуобуйатын учуоттаан тутулунна.

Аныгы тэриллэринэн хааччыллыбыт СМАРТ-поликлиниканы сыыппаралаах поликлиниканан ааҕыахха сөп. Бу поликлиникаҕа инникитин 55 тыһыынча кэриҥэ киһи сыһыарыллыаҕа.

Аныгы тэриллэр хаачыстыбаны мэктиэлииллэр

Тус-туспа киирэр ааннаах поликлиникаҕа биир симиэнэҕэ улахан дьон поликлиникатыгар — 300, оҕо поликлиникатыгар 180, дьахтар консультациятыгар 120 киһи сылдьар кыахтаныахтара.

Үлэлииргэ уонна эмтэнэргэ табыгастаах усулуобуйа доруобуйа харыстабылын үлэһиттэрэ көмөнү өссө ордук хаачыстыбалаахтык оҥороллоругар көмөлөһүөҕэ. Манна эспиэрт-кылаастаах 732 сүрүн тэрил таҥылынна, бу тэриллэртэн 70‑ча бырыһыана Арассыыйаҕа оҥоһуллубут.

Диагностика уонна терапия отделениелара, килииникэ-диагностика лабаратыарыйата, лучевой диагностика уонна доруобуйаны чөлүгэр түһэрэр эмтээһин отделениелара, суһал көмө кэбиниэтэ, күнүскү стационар, стоматология уонна бэйэ call-киинэ бааллар.

Түөрт лиип үлэлиир, аныгы тэриллэринэн, баһаары уонна буруону умулларар систиэмэлэринэн толору хааччыллыылаах.

Эмтэнээччилэргэ куттал суох буолар усулуобуйата тэрилиннэ

Дьокуускай куорат 2 №-дээх поликлиникатын кылаабынай бырааһа Саргылаана Васильева:

«Дьокуускай куораппыт Гагарин уокуругун, Марха уонна Маҕан сэлиэнньэлэрин олохтоохторугар анаммыт саҥа СМАРТ поликлиникабыт сэтинньи 24 күнүгэр үлэҕэ киирэн, бары да үөрүүбүт үксээтэ.

Поликлиникабытыгар мэдиссиинэ бары сулууспалара бааллар, үчүгэйэ диэн, бары киирэр-тахсар ааннара тус-туспа. Саҥа эбийиэкпит бырайыага мэдиссиинэ бастакы сүһүөх звенотун көрдөрүүлэрин учуоттаан оҥоһуллубута. Эмтэнээччилэрбитигэр куттал суох буолар усулуобуйата тэрилиннэ. Холобур, кыраадыһа тахсыбыт эбэтэр туох эмэ инпиэксийэлээх киһини кытары эмтэнээччилэр “алтыспаттар”.

Билиҥҥитэ 45 тыһыынча кэриҥэ киһини мэдиссиинэ өҥөтүнэн хааччыйабыт. Инникитин, 2026 сыл тохсунньу 1 күнүттэн Кангаласс уонна Сыырдаах нэһилиэнньэлэрин учуоттаан, өссө эбиллиэхпит. Онон, куорат хотугу өттө СМАРТ-поликлиникаҕа көрдөрүнэн, эмтэнэр кыахтанар.

Поликлиника кэлэктиибэ уонна биһиги эмтэнээччилэрбит өрөспүүбүлүкэ салалтатыгар махтаналлар. Аныгы поликлиникабыт СМАРТ диэн аатыгар сөп түбэһэр. Тоҕо диэтэххэ, поликлиника иһитиннэрэр технологиянан толору хааччылынна. Ону сэргэ эмтэнээччигэ электроннай докумуон оҥоһуллар, мэдиссиинэ түмүктэрэ киин архыыпка хараллаллар. Ыарыыны быһаарар уонна булар тэриллэрбит оҥоһуу өй (ИИ) функциялаахтар.

Биһиги каадырынан мэлдьи толору хааччыллыылаахпыт. Педиатр-быраастарынан, учаастактааҕы терапевтарынан уонна педиатрдарынан хааччыллыыбыт үчүгэй. СӨ Доруобуйа харыстабылын министиэристибэтэ эбии штаттары көрбүтэ.

Гагарин уокуругар аныгы СМАРТ-поликлиника үлэҕэ киириитэ — өрөспүүбүлүкэ доруобуйатын харыстабылын сайдыытыгар саҥа түһүмэх. Бу бастакы мэдиссиинискэй-санитарнай көмө табыгастаах уонна хаачыстыбалаах буоларын тупсарарга көмөлөһүөҕэ”, — диэн эттэ.

“Ыарыы аҕыйыырыгар баҕарабын …”

Мария ОХЛОПКОВА, Гагарин уокуругун олохтооҕо:

— Дьокуускай куорат бу өттүгэр кэлэн олохсуйуохпуттан 2 №-дээх поликлиникаҕа сыһыарыллан эмтэнэн-томтонон баччаҕа тиийэн кэллим. Урукку поликлиникабыт төһө да кыараҕас буоллар, быраастар үтүө санааларынан, кыһамньыларынан балыыһа усулуобуйатыгар да соччо наадыйбат курдук этим.

Ол гынан баран, үйэм уһаан, бу көрөрүҥ курдук, сырдык, ыраас поликлиникаҕа көрдөрүнэр буоллум. Үөрэрим диэн, манна оҕолорум, сиэннэрим сылдьыахтара турдаҕа. Ону сэргэ, эдэр үлэһиттэр кэлиэхтэрэ. Мин аҕыйах сыллаахха диэри Арассыыйа атын куораттарыгар син сылдьар этим. Онно маннык дьэндэйбит дьиэлээх балыыһалары олох аҕыйахтык көрөрүм. Ол аата биһиги салалтабыт, Доруобуйа харыстабылын министиэристибэтэ нэһилиэнньэ уһун үйэлээх буоларын учуоттаан, кэскиллээх тутуулары ыытан олоххо киллэрэр. Тапталлаах поликлиникам кэлэктиибигэр үрдүк таһымнаах үлэни-хамнаһы баҕарабын.