Куорат икки олохтооҕо түөкүттэргэ албыннатта

Дьокуускайга 3 №-дээх полиция отделын дьуһуурунай чааһыгар 41 саастаах дьахтар сайабылыанньа суруйбут.

Быһаарбытынан, кэргэнигэр билбэт нүөмэрдэриттэн эрийбиттэр уонна кинилэргэ сарсын дьиэлэригэр счетчик үлэтин бэрэбиэркэлии кэлиэхтээхтэрин туһунан эппиттэр. Иһитиннэрбиттэрин чопчулуур аатыран СМС-коду этэригэр соруйбуттар. Дьиэлээх хаһаайын ону итэҕэйэн этэн биэрбит. Сотору кэминэн, аны, «Госуслуги» саайтан төлөпүөннээбит аатырбыттар, порталга тус кэбиниэттэригэр кимнээх эрэ киирбиттэрин туһунан иһитиннэрбиттэр. Онон бу киһи харчытын «куттала суох счекка» көһөрөрүгэр түөкүттэр албыннаан эппиттэр. Онно итэҕэйэн эмсэҕэлээччи кэргэнин кытта кирэдьиит каартатыттан 200 тыһ.солк. көһөрбүттэр.

Дьокуускайга балыыһаҕа үлэлиир 64 саастаах быраас нолуок сулууспатын сымыйа үлэһиттэригэр итэҕэйэн, СМС-коду этэн биэрбит. Ол кэнниттэн түөкүттэр салгыы албыннааннар, 117 тыһ. сойбоппуттар.

СӨ ИДьМ дьону-сэргэни түөкүттэртэн сэрэтэр. Түөкүттэр дьон харчытын албыннаан ылар туһуттан араас албаһы туһаналларын этэр. Түргэнник уонна чэпчэкитик харчылаһар туһунан этиигэ итэҕэйимэҥ диэн сэрэтэллэр. Саарбах саайтарга бэйэҕит дааннайдаргытын суруйумаҥ, СМС-код кэллэҕинэ этимэҥ дииллэр. Өйдөөҥ, бааннар уонна быраабы харыстыыр органнар хаһан да төлөпүөннээн СМС-коду этиҥ диэбэттэр! Түөкүттэр угаайыларыттан сэрэнэргитигэр сүбэлииллэр.

СӨ ИДьМ пресс-сулууспата