Куорат суолга сулууспата ууну-хаары ыраастыы таҕыста

Быйыл Саха сиригэр хаар эрдэ түһэн, сатыы дьоҥҥо даҕаны, тырааныспарга даҕаны күчүмэҕэйдэри үөскэттэ. Дьокуускайга хас да күннээх түүн хаар түһэн, сырыыны хааччахтаата.

Онон сибээстээн, Дьокуускайга куорат дьаһалтата хаары-ууну ыраастааһын үлэтин күүһүртэ. Киин куорат иһигэр хаары хомуйуу үлэтэ салҕанар диэн Дьокуускай дьаһалтатын пресс-сулууспата иһитиннэрэр.

Уулуссаларга «Якутдорстрой» АУо 38 тиэхиньикэтэ уонна 35 суол үлэһитэ үлэлиир (грейдердар, погрузчиктар, уу кутар-ыраастыыр массыыналар, Бобкэттэр, самосваллар уонна ыраастыыр сиппиирдээх тыраахтардар).

Тротуардары 14 тиэхиньикэ уонна 28 бэдэрээччит-үлэһит ыраастыыр, ону таһынан муниципальнай тиэргэн ыраастааччы кыттыһар. Итини тэҥэ, ууну ыраастыыр систиэмэ үлэлиир: суоллартан ууну оботторорго 6 «Жилкомсервис» МУП уонна 10 бэдэрээтчик үлэлиир. Муниципальнай тиэргэн ыраастааччы муосталар, суолу туоруур кирилиэстэри, тохтобуллары, о.д.а. ыраастыыллар.