Куорат тииҥэ боруобатынан сылдьар

Кэнники сылларга Дьокуускай куоракка араас кыылы-сүөлү, хара, кыһыл саһыллары, тыҥырахтаах көтөрү, тииҥи көрбүттэрин, ааҕааччыларбыт хаартыскалаан ыыппыттарын таһаарбыппыт.

Бүгүн Дьокуускай куорат ортотугар, «Сэргэлээх уоттара» култуура киинин аттыгар, тииҥ боруобакка олорорун хаартыскалаан ыыттылар. Дьикти көстүү, куоракка «олохсуйбут» хара тыа кыылын, чыычаахтар курдук боруобакка олороро сэдэх. Бу тииҥ ити эргин уруккуттан баарын, ол гынан баран кэнники сүтэ сылдьан баран көстүбүтүн олохтоохтор этэллэр. Эрдэ тииҥнэр таас дьиэ истиэнэтинэн үөһэ-аллара сүүрэ сылдьар видеолара социальнай ситиминэн эмиэ тарҕаммыттаах.

“Сааһы быһа кэлэ-бара көрөр этибит, сайын сүтэ сылдьан баран көһүннэ. Доҕорбут хата баар эбит”, — диэн Дьокуускай куорат олохтооҕо кэпсиир.