Куорат үөрэҕин тэрилтэлэригэр үлэһиттэр, оҕолор ковид кэмигэр курдук мааскалаах сылдьыахтара

Дьокуускай куорат оскуолаларыгар сэтинньи 20 күнүттэн ыарыыны сэрэтэр соруктаах эбии тэрээһиннэри киллэрэллэр.

“Саха Өрөспүүбүлүкэтигэр ОРВИ уонна кириип эпидемиологическай балаһыаннньата уустугурбутунан сибээстээн, Роспотребнадзор ыйыытыгар олоҕуран, “Дьокуускай куорат” куораттааҕы уокурук үөрэҕин тэрилтэлэригэр 2025 сыл сэтинньи 20 күнүттэн санитарнай-противоэпидемическай (сэрэтэр) эбии тэрээһиннэр ыытыллаллар.

Ыарыыны сэрэтии быһыытынан үөрэх тэрилтэлэригэр дезинфекциялыыр эрэсиим күүһүрдүллэр, кэбиниэттэргэ “сарсыардааҥҥы фильтр” ыытыллар, ону тэҥэ, элбэхтик сууйуу-сотуу о.д.а. оҥоһуллар” – диэн Дьокуускай куорат үөрэҕин управлениетын телеграм-ханаалыгар иһитиннэрдилэр.

Оскуолалар номнуо хамсанан эрэллэр. Бэнидиэнньиктэн COVID-19 кэмигэр курдук мааскалаах сылдьыы ирдэниэҕин, уруоктар 35-тии мүн. буолуохтарын, оҕолор кыттыылаах туох баар култуурунай-маассабай тэрээһиннэри тохтоллорун туһунан биллэрдилэр.

Бэнидиэнньиктэн ыла үлэһиттэр, үөрэнээччилэр бары мааскалаах сылдьаллара ирдэнэр.