«Куораттан волонтердар кэлэн үлэлии сылдьаллар»

Нам сиригэр быйылгы халаан уута улахан хоромньуну оҥорон ааста.

Модут нэһилиэгин оскуолатын дириэктэрэ Иван Павлович Тихонов бүгүҥҥү балаһыанньаны маннык диир:

— Оскуолабыт этэҥҥэ ууга барбата, ол оннугар хортуоппуйбут сирэ, бадыбаалбыт бүтүннүү былдьанна. Оскуолабытыгар 109 оҕо үөрэнэр, ордук эмсэҕэлээбит дьиэ кэргэттэр оҕолорун, барыта 37 үөрэнээччини куорат лааҕырдарыгар ыыттыбыт. Атыттар ыраахтан олорон үөрэнэллэр. ОГЭ туттарааччылар Аппааны нэһилиэгэр, ЕГЭ туттарааччылар Хатырыкка баран туттараллара быһаарылынна.

Бөһүөлэк иһигэр уу  түһэн эрэр, хаалбыт ууну  ханааба хаһан түһэрэ, помпанан оботторо сылдьабыт. Бэҕэһээ куораттан 100 волонтер кэлбитэ, уу аҕалбыт отун-маһын ыраастаабыттара, бүгүн уонтан тахса киһи кэллэ, сарсын эмиэ кэлиэхтээхтэр. Гуманитарнай көмө кэлэр.