Куортамҥа биэрбит кыбартыыратыттан тэлэбиисэри сойбоппуттар

Дьокуускайга 2 №-дээх полиция отделын дьуһуурунай чааһыгар дьахтар кыбартыыратыттан тэлэбиисэрин илдьэ барбыттарын туһунан үҥсүбүт. 

Быһаарыллыбытынан, кини кыбартыыратын өр кэмнээх болдьоххо дьоҥҥо куортамҥа биэрбит. Дьиэтэ-уота хайдах туруктаах турарын көрөөрү кэлэн баран, 18 000 солк. тахса суумалаах тэлэбиисэрэ суоҕун билбит.

Суһал ирдиир үлэ түмүгүнэн, урут сууттана сылдьыбыт 40 уонна 26 саастаах, олохтоох, үлэтэ суох дьон буолаллара биллибит.

Чопчуламмытынан, үөһэ этиллибит кыбартыыраҕа эр киһи куортамнаан киирбит уонна арыгы иһээри икки табаарыһын ыҥырбыт. Арендалаабыт киһи бу дьонун хаалларан баран тахса сылдьыбыт. Оттон арыгы испит табаарыстара онно топпотохтор, өссө эбиниэхтэрин баҕараннар атын киһи тэлэбиисэрин уоран барбыттар. Ылбыт тэлэбиисэрдэрин 7000 солк. атыылаабыттар уонна барытын ити күн арыгыга бүтэрбиттэр.

РФ ХК 158 ыст. 2 ч. («Уоруу») холуобунай дьыала тэриллибит.

СӨ ИДьМ пресс-сулууспата