Куортамҥа бэриллибит кыбартыыраттан баайы-дуолу уорбут эдэр уол тутулунна

ИДьМ сулууспатын «Дьокуускайдааҕы»  2 №-дээх полициятын отделын дьуһуурунай чааһыгар дьахтар кыбартыыратыттан икки тэлэбиисэри уорбуттарын туһунан сайабылыанньа түһэрбит. Хоромньу уопсай суумата 46 тыһыынча солкуобай кэриҥэ буолла.

ИДьМ пресс-сулууспатын иһитиннэриитинэн, суһал-көрдүүр тэрээһиннэринэн холуобунай ирдэбил үлэһиттэрэ уорууга урут сууттана сылдьыбыт, Үөһээ Дьааҥы улууһуттан төрүттээх 29 саастаах кыбартыыраны урут куортамнаан олорбут эр киһи сыһыаннааҕын быһаардылар. Силиэстийэҕэ быһаарыллыбытынан, уорбаланааччы кыбартыыраны уһун болдьоххо куортамнаабыт. Сотору буолан баран, дьиэтин төлөбүрүн төлөөбөт уонна төлөпүөнүнэн эрийдэххэ эппиэттээбэт буолбут. Онуоха кыбартыыра хаһаайката дьиэтин бэрэбиэркэлии кэлэн, куортамдьыт көһөн барбытын уонна кинини кытта икки тэлэбиисэр сүппүтүн көрбүт. Уорбаланааччы икки ый устата кыбартыыраттан баайы-дуолу таһан, ломбардка туттарбыта биллибит. Киирбит харчытын бэйэтин наадатыгар туттубут. Бу чахчынан РФ Холуобунай кодекстын 158-с ыстатыйатын 2-с чааһынан («Уоруу») холуобунай дьыала тэрилиннэ. Бу ыстатыйанан эр киһи 5 сылга диэри көҥүлү быһыллыан сөп.