Суох үлэлэргэ толоруллубуттарын курдук илии баттаан

Горнай улууһун борокуратуурата Бүлүү улууһун «Инженернэй-тутуу управлениета» муниципальнай казеннай тэрилтэ дириэктэригэр тэриллибит холуобунай дьыалаҕа судаарыстыбаннай буруйдааһыны өйөөтө.

Кини РФ Холуобунай кодексатын 286 ыст. 1 ч.  (дуоһунаһын аһара туһаныы) икки эпизодтаах буруйу оҥорууга тардыллыбыт.

Өрөспүүбүлүкэ борокуратуурата ыыппыт силиэстийэтин матырыйаалларынан холуобунай дьыала тэрилиннэ.

Суут көрдөрүүтүнэн, 2020 сыллаахха Бүлүү улууһун дьаһалтатын уонна коммерческай тэрилтэ икки ардыларыгар өрөспүүбүлүкэ бүддьүөтүн суотугар икки социальнай эбийиэги – Уһун сэл. 150 миэстэлээх оскуоланы уонна Күбэйиндэ сэл. 50 миэстэлээх уһуйааны тутарга муниципальнай хантараак түһэрсибиттэрэ быһаарыллыбыт.

Ол кэнниттэн сууттанааччы, инженернэй-тутуу управлениетын салайааччытын дуоһунаһыгар олорон, эбийиэктэргэ оҥоһуллубатах тутар-таҥар үлэлэри оҥоһуллубуттарын курдук аактаҕа илии баттаабыт.

Холуобунай дьыаланы көрүү түмүгүнэн, суут судаарыстыбаннай борокуруор санаатын учуоттаан, эр киһини 1 сыл холоон көрөр болдьохтоох 2 сыл 6 ый усулуобунайдаах көҥүлүн быһыыга бириигэбэрдээтэ.

Бириигэбэр сокуоннай күүһүгэр киирэ илик, ааһыныыга биэриэххэ сөп, диэн иһитиннэрэр СӨ борокуратууратын пресс-сулууспата.