2021 сыллаахха түөрт оҕолоох Даниловтар дьиэ кэргэн Уһук Илиҥҥи ипотека бырагырааматыгар киирсэн уһаайба атыыласпыттара, «Килбиэнстрой» чааһынай тэрилтэни кытта дьиэ туттарар туһунан дуогабар түһэрсибиттэрэ. Ол эрээри, төрдүс сылларын ипотекаларын төлүүллэр. Даниловтар бэйэлэрин күүстэринэн туттан дьиэлэригэр киирбиттэрэ эрээри…
2021 cыллаахха Уһук Илиҥҥи ипотеканан 4 мөл. солк. ылан баран, 1.5 мөл. солк. Покровскай тракт 6 км уһаайба атыылаһан, дьиэлэнэр буоллубут диэн эрэх-турах санаммыттара. 8х10 иэннээх биир этээстээх дьиэни туттарар туһунан ити сыл муус устар 9 күнүгэр «Килбиэнстрой» диэн чааһынай тэрилтэни кытта дуогабар түһэрсибиттэрэ. Ити сыл “киир да олор дьиэни” атырдьах ыйын 30 күнүгэр диэри тэрилтэ тутан биэриэх буолан эрэннэрбитэ… Ол эрээри, кинилэр эрэллэрэ олоххо киирбэтэҕэ. “Дьиэбит тутулла охсоругар баҕабыт баһаам буолан, бэриллибит харчыны “Килбиэнстрой” счетугар ыыттарбыппыт. Санаабытыгар, харчыбытын төһө түргэнник ыытарбытыттан дьиэбит тутуллуута тутулуктаах курдуга”, — диэн ыал ийэтэ Саргылаана уйадыйа кэпсээбитин өйдүүбүн. Тэрилтэ салайааччыта Е. Куприянов «бу саҕалыам, ити саҕалыам» диэн эрэннэрэ сылдьыбыт.
РФ генеральнай борокуруора Дмирий Демешин 2024 сыллаахха Дьокуускайга кэлбитэ. Ыал аҕата Владислав Данилов Демешины сирэй көрсөн кыһалҕатын этиммитэ. Онуоха Демешин бу дьыаланы хонтуруолга ыларга, бэдэрээччити кытта сирэй көрсөн кэпсэтэргэ өрөспүүбүлүкэ борокуратууратыгар сорудахтаабыта. Ити кэннэ “Килбиэнстрой” ХЭУо-тан эмсэҕэлээбит сэттэ ыалтан Даниловтар эрэ дыалаларынан холуобунай дьыала тэриллибитэ. Дьокуускай куорат борокуратуурата буруйдуур түмүгү оҥорон, “Килбиэнстрой” ХЭУо-ҕа оҥоһуллубут холуобунай дьыаланы суукка ыыппыта. Силиэстийэлээһин түмүгүнэн, тэрилтэ салайааччыта 2020 сыл кулун тутарыттан 2023 сыл сэтинньитигэр диэри дьоҥҥо дьиэ тутуох буолан харчыларын суйдаан түөкүннээбит. Элбэх дьону кытта дьиэ тутуох буолан дуогабар түһэрсибит. Дьон ыыппыт харчыларын тутан баран, тутуу матырыйаалын атыыласпакка, дьиэ туппакка, атын сыалга туттубута биллибит. Уопсай хоромньу суумата 24 мөл. солкуобайтан тахсыбытын туһунан СӨ борокуратууратын пресс-сулууспата иһитиннэрбитэ. Дьыаланы Дьокуускай куорат суутугар ыыппыттара.
Дьокуускай куорат суутун уурааҕынан буруйданааччы Е. Куприяновы биэс сылга күһэлэҥ үлэҕэ Краснодарга, дьиэ кэргэниттэн чугас анаабыттара. Онно үлэлээбит хамнаһынан иэһин төлүөхтээх. Күһэлэҥ үлэ диэн хаайыы буолбатах, оҥорбут буруйун боруостууругар, иэһин төлүүрүгэр кыах бэриллэр.
«Кыһалҕаттан бэйэбит күүспүтүнэн былырыын сэтинньи саҥата дьиэбитин туттан киирбиппит. Көҥдөйө аҥаарыгар диэри тутуллубутун салҕаан, кырыыһалаан, муосталаан үлэ, ороскуот бөҕөтүн көрсүбүппүт. Билигин биһиги Уһук Илиҥҥи ипотекабытын, ону сэргэ дьиэ туттарбытыгар кыра-кыра ылбыт хас да кирэдьииппитин төлүү олоробут. Элбэх дьону албыннаабыт Е. Куприянов суут быһаарыытынан биэс сылга күһэлэҥ үлэҕэ Краснодарга анаммыта. Оннук барбыта биир сыл буолла. Уопсайа “Килбиэнстрой” тэрилтэттэн эмсэҕэлээбит сэттэ ыалтан биһиги эрэ эмсэҕэлээһиммитинэн холуобунай дьыала тэриллибитэ. Холуобунай дьыала тэриллиэн иннинэ биһиги хоромньубутун эспэртиисэлэппиппит уопсай суумата 1 мөл. 400 тыһ. солк. диэн тахсыбыта. Оттон холуобунай дьыаланан эспэртиисэ оҥоһуллубутун кэннэ хоромньу суумата 900 тыһ. солк. тэҥнэспитэ. Онон Е. Куприянов биһиэхэ 900 тыһ. солк иэстээх да, билиҥҥитэ 334 эрэ солк. төлөөтө. Ааспыкка суут бириистэптэрэ, харчы ыытаары гыналлар диэн эрийэ сылдьыбыттара. Биһиги дьэ, киһибит иэһин төлүүр буолла диэн үөрүү бөҕө буолбуппут баара, күлүү гыммыт курдук счеппутугар 94 солк. кэлэн түспүтэ. Ол кэннэ 240 солк. кэлбитэ. Бачча кыра сууманы ыытаары аймалҕан бөҕө буолбутуттан киһи да сонньуйар», — диэн Даниловтар кэпсээтилэр.
Үс сыл устата ардах-хаар анныгар кырыыһата суох турбут дьиэни салгыы тутуу хаһаайыттар сүрүн кыһалҕаларынан буолбута. Кинилэр кырыыһа оҥортороллоругар аҥаардас биригээдэҕэ 180 тыһ. солк., тутуу матырыйаалыгар 700‑тэн тахса тыһ. солк төлөөбүттэрэ. Ол кэннэ аны дьиэ муостата, бытархай оҥоһуллар үлэ — т үннүк, аан, уот тардыыта, гаас ситимэ — киһи ааҕан сиппэт.
Владислав Данилов, дьиэ кэргэн аҕа баһылыга:
— 20 кв. м иэннээх хоско түөрт оҕолоох салгыы олорор кыахпыт суоҕа. Ону таһынан, дьиэбит ардахха-хаарга кырыыһата суох туран иэдэйэ сыспыта. Ол иһин массыынабытын атыылаан, кыра кирэдьииттэргэ киирэн, кирэдьиит каартатын эҥин туһанан, дьиэбитин туттан киирдибит. Хаһан эмит ордук харчыланнахпытына, эркиннэрин хаттыгастыа этибит. “Килбиэнстрой” тэрилтэ туппут эркиннэрэ билигин улахан тымныыларга муус-кырыа буолан, тымныыта сүрдээх. Дьиэбитигэр киирбит үөрүүбүтүттэн ону улахан кыһалҕа курдук көрбөппүт.
Куприянов күлүү гыммыт курдук, 334 солк. төннүннэрдэ. Эбиитин эрдэ босхолоноору, үрдүк дуоһунастаах дьонунан Үрдүкү суукка сурук суруттарар. Оттон биһиги ый ахсын кураанахха ипотека төлүүбүт…
Киһи аймах туой иһити неолит кэмиттэн, саҥа таас үйэттэн оҥостор, туттар буолбут. Саха омук даҕаны…
Хаһыаппыт бүгүҥҥү ыалдьыта, дьоруойдуу быһыы, бойобуой доҕордоһуу диэн тугун бэркэ билэр, биһиги биир идэлээхпит, кэллиэгэбит,…
Эдэриттэн эмэнигэр тиийэ саҥа сылы кытта хайаан даҕаны үтүө, кэрэ кэлиэҕэ, эһиил быйылгытааҕар өссө ордук…
Кистэл буолбатах, үгүстэргэ “мин билэр буоллум да, киһи барыта билиэхтээх” диэн өйдөбүл иҥэн хаалбыт. Билбэтин…
Бүгүн, ахсынньы 21 күнүгэр, өрөспүүбүлүкэ баһыйар үгүс өттүгэр кыралаан хаардыаҕа. Халымаҕа, Аллайыахаҕа хаар сөбүгэр түһүөҕэ.…
Бүгүн Күн салайар күнэ — өрөбүл. Онон айар-тутар эрчим, үөрүү-көтүү уонна сырдык баһылыаҕа. Онуоха эбии,…