Курбуһахтааҕы интэринээт-дьиэ 30 сылын бэлиэтээтэ

Курбуһахтааҕы кырдьаҕастар, инбэлииттэр интэринээт-дьиэлэрэ тэриллибитэ 30 сылын бэлиэтээтэ. Ахсынньы 12 күнүгэр манна өрөспүүбүлүкэтээҕи сэминээр буолла. Тэрилтэ үлэһиттэрэ когнитивнай кэһиллиини сэрэтэргэ бэйэлэрин уопуттарын үллэһиннилэр.

Курбуһахха интэринээт-дьиэ 1994 сыллаахха аһыллыбыта. Интэринээт-дьиэ 2-с №-дээх Өрөспүүбүлүкэтээҕи балыыһа геронтологияҕа отделениетын кытта ыкса үлэлэһэр. Манна түөһэйиини утары уонна кырдьар сааска чөл туруктаах сылдьарга анаан дьарыктар ыытыллаллар.

Кырдьаҕастар олорор хосторо дьиэ курдук нус-хас ис барааннаах. Онон тэрилтэҕэ олорор курдук санамматтар. Барыта 51 киһи олорор. Саамай кырдьаҕастара Павел Павлович Портнягин 86 саастаах. Кини интэринээт-дьиэ тэриллиэҕиттэн, 30 сыл олорор. Билиҥҥэ диэри байааҥҥа оонньоон, олохтоохтору сэргэхситэр.

85 саастаах норуот маастара Явловская Клара Михайловна уонна Павлова Матрена Александровна иистэрин бырахпакка, тута сылдьаллар. Улуустааҕы, өрөспүүбүлүкэтээҕи быыстапкаларга, куонкурустарга көхтөөхтүк кытталлар.

Интэринээт-дьиэ 36 үлэһиттээх, кинилэртэн 6 киһи «СӨ социальнай сулууспа туйгуна» бэлиэлээх. Сиэстэрэ-хаһаайка Васильева Ольга Николаевна 30 сыл, Пестряков Андрей Иванович 25 сыл үлэлииллэр. Повардар бары элбэх оҕолоох ийэлэр.

Кинилэр кырдьаҕастар, инбэлииттэр улахан кыһалҕаны көрсүбэккэ, нус-хас олороллоругар кыһаллаллар, сынньалаҥнарын тэрийэллэр.