Курьер дьону 1,6 мөл.солк. албыннаан сууттаныаҕа

Дьокуускай борокуратуурата куорат олохтооҕор тэриллибит холуобунай дьыаланы суукка ыытта. Кини дьону харчыга албыннаабытын туһунан СӨ Борокуратуурата иһитиннэрэр.

Силиэстийэ дааннайдарынан, курьер биллибэт дьону кытта биир үлэлэһэн, түөрт биэнсийэлээх дьонтон — 85-91 саастаах дьонтон 1,6 мөл.солк. тахса харчыны суйдаабыт.

Түөкүттэр быраабы араҥаччылыыр уорган үлэһиттэрэбит диэн албыннаан, аҕам саастаах дьоҥҥо аймахтаргыт суол быһылааныгар буруйданнылар диэн иһитиннэрэллэр эбит. Салгыы бу дьон аадырыстарын билэн, дьиэлэригэр кэлэн харчыларын ылан бараллар. Ону бөлөхтөрүн тэрийээччилэрин счетугар ыыталлар. Бу өҥөлөрүн иһин уорбут суумаларыттан 5 бырыһыанын ылаллар эбит.

Туох баар дакаастабыл баарын үрдүнэн, буруйданааччы буруйун билиммэтэх, кинини бэйэтин схема тэрийээччилэрэ булкуйа сылдьыбыттарын туһунан эппит.