Курскай кыргыһыытын 82 сылыгар сибэкки дьөрбөтүн уурдулар

Бүгүн, атырдьах ыйын 23 күнүгэр, Дьокуускай куорат Кыайыы болуоссатыгар Курскай кыргыһыытыгар фашист сэриилэрин үлтүрүппүттэрин 82 сылын чиэһигэр «Кыайыылаах буойуттарга» монумеҥҥа сибэкки дьөрбөтүн ууруута буолла.

Курскай кыргыһыытыгар Улуу Кыайыыларын чиэһигэр СӨ Үлэҕэ уонна социальнай сайдыыга миниистирин бастакы солбуйааччыта Альбина Трубина, СӨ Ыччат дьыалаларыгар уонна социальнай коммуникацияларга миниистирин солбуйааччыта Александр Максимов, Дьокуускай куораттааҕы Дума бэрэссэдээтэлэ Альберт Семенов, Дьокуускай куорат баһылыгын солбуйааччыта Владимир Дорожкин, Ил Түмэн норуотун дьокутааттара, Дьокуускай куорат Думатын дьокутааттара, ыччат, куорат уопсастыбаннаһа, киин куорат олохтоохторо уонна ыалдьыттара сибэкки дьөрбөтүн уурдулар.

Тэрээһин кыттыылаахтара бу кыргыһыы Иккис Аан дойду сэриитин хаамыытыгар тосту уларыйыыны саҕалаабытын уонна Кыһыл Аармыйа баһыйар күүстээҕин бүтэһиктээхтик бигэргэппитин бэлиэтээн, устуоруйаҕа улахан суолталааҕын эттилэр.

Кыргыһыы 50 хонук устата күнүһүн-түүнүн салҕанан, атырдьах ыйын 23 күнүгэр сэбиэскэй күүстэринэн фашист сэриилэрэ үлтүрүтүллэн түмүктэммитэ. Курскай кыргыһыыта хас биирдии саллаат үрдүк бойобуой хаачыстыбатын көрдөрбүтэ. Бу сүрүн кыргыһыыга Саха сириттэн сылдьар буойуттар эмиэ кыттыбыттара.

Курскай кыргыһыытын кэнниттэн фашист кимэн киирэр дьайыылартан аккаастанан, көмүскэнэр стратегияҕа көһөргө күһэллибитэ. Национальнай киэн туттууну үөскэтэр, эдэр көлүөнэни устуоруйаны ытыктыыр уонна Аҕа дойдуга таптал тыыныгар иитэр улуу түгэн туһунан өйдөбүлү харыстаан илдьэ сылдьар наадалаах.

Улуу Кыайыы 80 сылынан дойду үрдүнэн РФ Бэрэсидьиэнэ Владимир Путин дьаһалынан Аҕа дойду көмүскээччитин сылынан биллэриллибитэ. Өрөспүүбүлүкэҕэ Ил Дархан Айсен Николаев Ыйааҕынан Ийэ дойду көмүскээччитин сыла бэлиэтэнэр.