Кустуурга быыһааччылар сүппүт оҕону буллулар

От ыйын 22 күнүгэр   1.13  чааска СӨ Быыһыыр сулууспатыгар Эбээн-Бытантай  улууһун  «Аллараа Бытантай нэһилиэгэ» МТ Кустуурга 2019 сыллаах төрүөх оҕо сүппүтүн туһунан иһитиннэрии киирбит.

Сүппүт оҕону көрдөөһүҥҥэ олохтоох дьонтон  50 доброволец кыттан итиэннэ   Баатаҕайтан  «Полярные авиалинии» АХ бөртөлүөтүнэн СӨ Быыһыыр сулууспатын Үөһээ Дьааҥытааҕы быыһыыр-көрдүүр этэрээтин 8 быыһааччыта, Үөһээ Дьааҥытааҕы Ис дьыала салаатын 6 үлэһитэ көмөҕө кэлбиттэр. Балтараа чаас кэнниттэн бөртөлүөтүнэн үөһээттэн быыһааччылар бөлөхтөрүн көмөлөрүнэн, оҕону булаллар. Кустууртан 6 км сиргэ оҕону буланнар,  санитарнай рейсинэн Баатаҕайга илдьибиттэрин туһунан СӨ Быыһыыр сулууспата иһитиннэрдэ.