Кустуурга оскуола «Уйа» бырайыагынан саҥа куурусса хотонун үлэҕэ киллэрдилэр

Кустуур сэлиэнньэтигэр сэтинньи 6 күнүгэр И.Н. Слепцов аатынан агро-оскуола «Уйа» бырайыагын чэрчитинэн тутуллубут саҥа куурусса хотонун үөрүүлээхтик аста.

Бу оскуола оҕону үлэнэн иитиигэ уонна тыа хаһаайыстыбатын сайыннарыыга ситиһиилээхтик үлэлиир. И.Н. Слепцов аатынан Кустуурдааҕы агро-оскуола оҕону кыра сааһыттан үлэҕэ уһуйууга тиһиктээх үлэни ыытар. Үөрэнээччилэр сайынын «Мэрлэнкэ» көс оскуоланан таба ыстаадатыгар көмөлөһөллөр, сорохторо оттууллар, оттон бөһүөлэккэ хаалбыттар оҕуруот аһын үүннэрэллэр. Быйылгыттан бу хайысхаларга көтөрү иитии эбилиннэ. Бу туһунан «Эбээн-Бытантай уоттара» хаһыат саайта иһитиннэрэр.

«Тыа хаһаайыстыбатын сайыннарыыга Ил Дархан Айсен Николаев туруорар соруктарын толорууга биһиги оскуолабыт «Уйа» диэн бырайыак оҥорон үлэлэттэ. Көтөрү иитии – түргэнник бородууксуйа биэрэр салаа буолар. Ставропольскай уонна Московскай уобаластартан Ломан-Браун уонна Пушкинскай боруода сымыыттарын аҕалан, чоппууска таһаарбыппыт. Бастакы сымыыппытын атырдьах ыйын 6 күнүгэр ылан, үлэбит түмүгэ көстөн, олус үөрбүппүт», – диэн кэпсиир Кустуур орто оскуолатын дириэктэрин иитэр үлэҕэ солбуйааччыта Надежда Слепцова. Кини бэлиэтииринэн, хотугу тыйыс усулуобуйаҕа маннык хаһаайыстыбалар ас-үөл экэниэмикэтигэр улахан суолталаахтар. Сэтинньи 6 күнүгэр ыытыллыбыт аһыллыы сиэригэр-туомугар кыһыл лиэнтэни оскуола дириэктэрэ Матрена Горохова уонна педагогическай үлэ бэтэрээнэ Ольга Рожина быстылар. Үөрүүлээх чаас кэнниттэн үөрэнээччилэргэ «Уйа» хотонугар экскурсия тэрилиннэ. Оскуола күһүн дьаарбаҥкаҕа эттээх боруода кууруссаларын амсатан, билигин бэйэтин сымыытын учууталларга атыылаан саҕалаабыт. Кэлин бородууксуйа элбээтэҕинэ, нэһилиэнньэҕэ атыыга таһаарар былааннаахтар.