Кут уйбат сирдэрэ
Саха сиригэр атын эйгэлээх сирдэр баалларын туһунан элбэхтик суруйан турабыт. Биһиги өрөспүүбүлүкэбитигэр эрэ буолбакка, Арассыыйа атын эрэгийиэннэригэр даҕаны киһи кута-сүрэ тохтообот сирдэрэ дэлэйдэр. Онтон аатырбыт биэс сир туһунан кэпсэтиэххэ.
НЛО-ЛААХ МОЛЕБСКАЙ ТРЕУГОЛЬНИК, ПЕРМСКЭЙ КЫРААЙ
Молебскай треугольникка биллибэт көтөр эттиктэри (НЛО-лары), туга биллибэт хара өҥнөөх харамайдары, уоттаах саарыктары көрбүттэрин туһунан суруйуу элбэх.
Молебки сэлиэнньэ Свердловскай уобалас уонна Пермскэй кыраай кыраныыссалаһар сиригэр турар. Бу сэлиэнньэ НЛО үөрдээн мустар сирэ диэн ССРС эрдэҕиттэн аатырар. Эрдэ манна олорбут манси диэн норуоттар НЛО-ҕа бэрик биэрэллэрэ үһү. Өссө сорох дааннайдарынан, бу оройуоҥҥа Заратустра бороруок күнү көрбүт диэн.
1989 сыллаахха “Советская молодежь” диэн Рига хаһыатыгар Павел Мухортов диэн киһи Молебки аттыгар баар көтөр эттиктэр туһунан хас даҕаны ыстатыйаны суруйан турар. Кини НЛО-ны, хара харамайдары, уоттаах саарыктары көрбүт дьону кытта көрсөн кэпсэппитин киэҥ эйгэҕэ сырдаппыт. Онно сурулларынан, Молебскай треугольникка кэм атыннык ааҕыллар, биридимиэттэр салгыҥҥа ыйана сылдьаллар, дьон куруук туох эрэ дьикти тыаһы-ууһу истэр эбит.
ӨЛБҮТТЭР ТУМАННААХ КУОРАТТАРА ЭБЭТЭР ДАРГАВС, ХОТУГУ ОСЕТИЯ
Хотугу Осетия хайаларыгар 1400 миэтэрэ үрдүккэ томторго таас башнялар бааллар. Бу эргэ некрополь Даргавс сэлиэнньэтин аттыгар баар, маны өссө Өлбүттэр куораттара диэн ааттыыллар эбит.
Үһүйээҥҥэ кэпсэнэринэн, биирдэ Даргавска кэрэ дьүһүннээх дьахтар төрөөн-үөскээн олорбут. Чугастааҕы-ыраахтааҕы эр дьон бары кинини таптаабыттар, ойох ыла сатаабыттар. Былдьаһан этиһэ-охсуһа сатаан бараннар, бүтэр уһугар кырасаабыссаларын өлөрөн кэбиспиттэр. Бу дьахтар өлбүтүн кэнниттэн эр дьону куһаҕан кырыыс батыспыт: тыыннаахтыы сытыйан өлөр буолбуттар. Тыыннаах ордубут дьон сытыйбыт дьону сиргэ көмө сатыыллар эбит, аны кинилэр өлүктэрин сир ылбат, төттөрү үөһээ таһаара турар эбит. Онон олохтоох дьон хайа үрдүгэр таас башнялары тутар, онно уҥуохтарын тутарга санаммыттар.
18-с үйэҕэ холера эпидемиятыгар сыстыбыт дьон дьиэлээхтэрин сыһыарымаары бу башняларга кэлэн олохторун моҥууллара үһү. Кинилэр мумиялара билиҥҥэ диэри ол башняларга хараллан сытар. Ол муҥнаммыт дьон үөрдэрэ дэҥҥэ көстөн ааһар диэн кэпсииллэр. Маннык 95 склеп тутуллубут, хас биирдиитигэр сүүстүү киһи уҥуоҕа баар.
СОЛОВКИ БЫЛЫРГЫ ЛАБИРИННАРА, АРХАНГЕЛЬСКАЙ УОБАЛАС
Белай муораҕа Соловецкай арыылар туристары угуйар сир буолар. Манна Большой Заяцкай диэн арыыга тааһынан, сиринэн оҥоһуллубут 35 былыргы лабиринт баар. Олохтоохтор бу сири “вавилоннар” диэн ааттыыллар.
Биир чахчынан, бу – тыыннаахтары өлбүт дьон дууһата аймаабатын диэн дууһалар мунньустар сирдэрэ. Лабириннар анныларыттан археологтар уматыллыбыт киһи уҥуохтарын булбуттар. Маныаха майгынныыр сирдэр Мурманскай уобаласка бааллар.
Манан Соловецкай арыы дьиктилэрэ бүппэт. Ааспыт үйэ саҕаланыыта манна СЛОН диэн ааттанар лааҕыр, кэлин ГУЛАГ биир хаайыыта, тэриллэ сылдьыбыт. Олохтоохтор кэпсииллэринэн, Белай муораҕа биирдэ эмит долгуннар быыстарыттан тыһыынчанан чүмэчи умайан турара көстөр үһү. Ол аата оччолорго ытыллан өлбүт дьон дууһалара малыыппа көрдүүллэр диэн сабаҕалааһыннар бааллар.
КАПУСТИН СЫЫРЫН КИСТЭЛЭҤНЭЭХ БУНКЕРА, АСТРАХАНСКАЙ УОБАЛАС
Бу сиргэ 1946 сыллаахха байыаннай полигон тэриллибит. Манна баллистическай, геофизическай уонна метеорологическай аракыаталары көтүтэр, чинчийэр учаастак үлэлээбит. Ол иннинэ шоссе тутуллубут, тимир суол кэлбит. 1956 сыл олунньутугар манна ракетнай-ядернай сэби оҥоро сылдьыбыттар. Кэлин космодром тутуллубут.
Байыаннай эбийиэк анныгар бункер баарын туһунан үһүйээннэр сири биир гына тарҕаммыттара ыраатта. Хас даҕаны этээстээх “Объект 754” диэн ааттаах бункер баар сураҕын дьон итэҕэйэр. Бункерга аракыаталар эстэрбит НЛО-ларын хараабыллара бааллар үһү. Онон бункер аан дойдуга биир саамай чып кистэлэҥнээх сабыылаах эбийиэгинэн ааҕыллар дииллэр. Эбийиэк сиртэн 50 миэтэрэ аллараа сытар, 150 миэтэрэ уһуннаах үһү. НЛО хараабылларын аҕалаары тимир суоллары, шоссены эрдэ былааннаан туппуттар диэн сабаҕалааһын баар. Сир үрдүттэн туох да биллибэт, арай вентиляция турбата быгар томторо баара биллэр.
КАШКУЛАКСКАЙ ХАСПАХ, ХАКАСИЯ
Кашкулакскай хаспах Хакасия Кузнецкай Алатау диэн оройуонун хойуу тыатын быыһыгар турар. Атыннык Хара абааһы хаспаҕа диэн ааттыыллар. Урут манна ойууннар кыыраллара үһү. Бу сирдэри билбэт киһи таах мунуон сөп: хайа иһигэр хас даҕаны холуодьас баар. Хаспахха киирдэххэ, кыыл уҥуохтара, сиэртибэ сиэрин-туомун оҥорбут күллэрин тобоҕо сытар буолар үһү.
60-с сылларга манна устудьуоннар сүппүттэр, чинчийэ кэлбит геологтар галлюцинациялаан сордоммуттар. Геологтар бары биири көрөллөр үһү: түү бэргэһэлээх ойуун хаспах түгэҕэр ыҥырарын.
Биһиги кэммитигэр учуонайдар бу хаспахха лаборатория тэрийэн үлэлэппиттэр. Кинилэр чинчийэннэр бу сиргэ геомагнитнай аномалия баарын дакаастаабыттар. Өссө киһи кулгааҕар сатаан иһиллибэт тыас баарын, ол эрээри психикаҕа куһаҕаннык дьайар күүстээҕин билбиттэр.
Сообщить об опечатке
Текст, который будет отправлен нашим редакторам: