Куту-сүрү көннөрөр, эти-сиини эмтиир илбистээх илбииһиттэр

Анал байыаннай дьайыы саҕаламмыта төрдүс сылыгар барда. Бу сыллар тухары Саха сирин олохтоохторо, түмсүүлэр, хамсааһыннар, кэллэктииптэр ким-туох кыахтааҕынан, тугу сатыылларынан бары биир сомоҕо күүс буолан көмөлөһө сылдьаллар. Кинилэр ортолоругар байыаннай дьайыы кыттыылаахтарыгар уонна кинилэр дьиэ кэргэттэригэр чэбдигирдэр хостору аһаттаан волонтер-эмчиттэр үлэлии сылдьаллар.

Маҥнай Вероника Семенова-Хомусчаана салайааччылаах бөлөх байыаннай дьайыы кыттыылаахтарыгар уонна өлбүттэр дьиэ кэргэттэригэр эрэ көмөлөһөр эбит буоллаҕына, билигин үлэ хайысхата кэҥээбит. Анал байыаннай дьайыы кыттыылаахтарыгар бэйэлэригэр, кинилэр дьиэ кэргэттэригэр, ону таһынан бииргэ төрөөбүттэригэр көмөлөһөллөр. «Биллэн турар, чугас дьонноро эмиэ ыарахан охсууну ылаллар диэммит көмөлөһө сатыыбыт», — диэн Вероника Николаевна бэлиэтиир.

Вероника Семенова-Хомусчаана – Арассыыйа эмчиттэрин конфедерациятын Саха сиринээҕи салаатын бэрэссэдээтэлэ, «Мега» волонтер-эмчиттэр түмсүүлэрин салайааччыта, алгысчыт, норуот эмчитэ, норуодунай мэдиссиинэ туйгуна, этнопсихолог уонна уйулҕаһыт. Кини салайар түмсүүтэ анал байыаннай дьайыы кыттыылаахтарыгар уонна кинилэр дьиэ кэргэттэригэр 2023 сыл ахсын ахсынньы ыйыттан саҕалаан күүстээх көмөнү оҥорор.

Дьокуускай куоракка маннык түөрт кэбиниэт үлэлиир. Ол курдук, Бестужев-Марлинскай уулуссатыгар ДОСААФ уонна «Якутия с тобой!» ыстааптарыгар, Кузьмин уулуссатын 10-гар «Союза семей Якутии «Память воинов СВО» тэрилтэҕэ уонна Бааһынай ырыынагар өйү-санааны сааһылааһыҥҥа, эти-сиини чэбдигирдэргэ үлэлиир хостоохтор. «Союза семей Якутии «Память воинов СВО» кэбиниэтигэр анаан сүтүктээхтэри, сураҕа суох сүппүттэр уонна өлбүттээхтэр дьиэ кэргэттэрин ыҥыраллар. Маннык кэбиниэттэри улуус ахсын аһарга дьулуһаллар, тоҕо диэтэххэ, улуус аайы байыаннай дьайыы таарыйбатах ыала диэн суоҕун кэриэтэ, уолаттар дойдуларыгар төннөн кэлэллэр, кинилэргэ көмө хайаан даҕаны наада.

Уопсайа 28 улууска сылдьан үлэлээбиттэр. Эмчиттэр улуустарга баһылыктар, социальнай салалта үлэһиттэрин көмөлөрүнэн босхо илбийэн эмтиир хостору аһаллар. Үгүс хостор Вероника Николаевна уолун позывной аатынан – «Мега» диэн ааттаахтар. Өлөөҥҥө маннык үс хос үлэлиир эбит. Олортон биир хос 114-с биригээдэҕэ Вероника Николаевна уолун кытта бииргэ сулууспалаабыт «Амака» диэн позывнойдаах уол аатынан ааттаммыт. Сорох улуустарга эмчиттэр суох буолан, маннык кэбиниэттэри кыайан аспаттар. Оннукка бэйэлэрэ тиийэн эмтииллэр.

Вероника Николаевна бэйэтэ сураҕа суох сүппүттэргэ үлэлэһэр. Москва госпиталларынан, Донецкайынан, Луганскайынан сылдьаллар, сүппүт байыастары көрдүүллэр. Бүтэһигин былырыын ахсынньы ыйга баран кэлбиттэр, ол түмүгэр 50-н тахса уол көстүбүт. Аны олунньу бүтүүтэ барарга былаанныыллар. Аны туран, сырыы аайы госпиталларга баралларыгар 4-5 дьааһык гуманитарнай көмөнү илдьэллэр. Онно дронтан көмүскүүр суорҕаннары, былаастары, таҥаһы, эми-тому, аһылыгы бэйэлэрэ соһон-сыһан тиэрдэллэр.

Вероника Николаевна тэрийбит түмсүүтүгэр 45 баҕа өттүнэн көмөлөһөр эмчит баар. Кинилэр чэбдигирдэр массааһы, илбийиини, хааннааһыны, уйулҕа  көмөтүн, ыраастааһыны, арчылааһыны оҥороллор. Үлэ өйү-санааны сааһылааһыҥҥа, доруобуйаны чэбдигирдэргэ туһуланар. Эмчиттэр үгүстэрэ этнопсихолог, массажист үөрэхтээхтэр, алгысчыттар.

«Биһиэхэ уопсайа 4000 кэриҥэ киһи сырытта, 10000 кэриҥэ илбийиини босхо оҥордубут. Дьоммутун-сэргэбитин өйүүр сыаллаах маннык туругу чэбдигирдэр хостору аһан үлэлэтэрбит сүргэбитин көтөҕөр», — диэн Вероника Николаевна-Хомусчаана кэпсээнин түмүктүүр. Бу үлэ норуот биир тыыннаах буолуутун уонна бэйэ-бэйэҕэ көмөлөһүүтүн күүһүн чаҕылхай холобура буолар.