Кузбааска «Азия оҕолоро» түмүктэннилэр

Кемерово куоракка бүгүн, кулун тутар 4 күнүгэр, норуоттар икки ардыларынааҕы «Азия оҕолоро» спортивнай кыһыҥҥы иккис оонньуулар түмүктэннилэр.

Кемеровскай уобалас — Кемерово, Новокузнецкай, Междуреченскай куораттарыгар уонна Таштагол оройуонугар уон күн устата 12 дойду эдэр спортсменнара успуорт кыһыҥҥы 10 көрүҥэр 57 мэтээл кэмпилиэгин иһин илин-кэлин түһүстүлэр.

Онон бүгүн бүтэһик күрэхтэһиилэр ыытылланнар, оонньуулар үөрүүлээх сабыллыыта буолла. Кузбаас губернатора Сергей Цивилев, РФ успуорка миниистирин бастакы солбуйааччы Азат Кадыров, «Азия оҕолоро» норуоттар икки ардыларынааҕы кэмитиэт бэрэсидьиэнэ Владимир Максимов оонньуулар үрдүк таһымнаахтык ыытыллыбыттарын, спортсменнар чиэһинэй киирсиини көрдөрбүттэрин бэлиэтээтилэр, тэрийээччилэргэ махтаннылар.

— Кыһыҥҥы иккис оонньуулар этэҥҥэ түмүктэннилэр. Чиэһинэй уонна кыраһыабай киирсиилэри көрдөрөн, эдэр спортсменнар биһиги барыбыт сүрэхпитин ууллардылар. Кузбаас түөрт сиринэн-уотунан ньиргиэрдээх, өрө күүрүүлээх күрэхтэһиилэр олус түргэнник аастылар. Оонньуулары тэрийэргэ көмөлөспүт дьоҥҥо махтанабын — Кемеровскай уобалас салалтатыгар, губернатор Сергей Цивилевка, оонньуулар дирекцияларыгар. Салгыы даҕаны бу тутуллубут баараҕай эбийиэктэр Кузбаас олохтооторугар туһалыы, сырдыкка-кэрэҕэ угуйа турдуннар. Оонньуулары түмүктэммитинэн ааҕабын, — диэн норуоттар икки ардыларынааҕы кэмитиэт бэрэсидьиэнэ Владимир Максимов эттэ.

«Кузбаас» муус дыбарыаһыгар «Азия оҕолоро» оонньуулар кыһыл көмүс, үрүҥ көмүс, боруонса призердарын парааттара буолла. Оонньуулар былаахтарын ситиһиилээхтик кыттыбыт спортсменнар — Кузбаастан Дмитрий Подольскай, Казахстантан Толеген Мейиржан, Москваттан Матвей Бажанов, Ураалтан Тихон Кочергин таһаардылар.

Оонньуулар тэрээһинин уонна Саха сирин сүүмэрдэммит хамаандатын кыттыытын туһунан СӨ успуорка уонна физическэй култуураҕа миниистирин бастакы солбуйааччы Александр Бугаев санаатын үллэһиннэ:

— Биһиги өрөспүүбүлүкэбит эдэр спортсменнара бу оонньууларга ситиһиилээхтик кытыннылар диэн этиэхпин баҕарабын. Хамаандабыт аҕыс мэтээллээх. Бастакы мэтээли сноубордист Илья Соколов аҕалбыта, салгыы сэттэ мэтээли хайыһардьыттарбыт ситистилэр. Кыһыҥҥы бастакы оонньууларга хайыһардьыттар мэтээл ылбатах буоллахтарына, билигин тириэньэрдэрбит сыралаах үлэлэрин түмүгэ көһүннэ. Хайыһар спринт көрүҥэр мэтээллэннибит — Инна Рыбкина үрүҥ көмүс, Вадим Ширяев үрүҥ көмүс, Вадим Кривоногов боруонса мэтээллэри ылбыттара.

Бүгүн ыытыллыбыт «Доҕордоһуу эстафетатыгар» булкаас хамаандалар истэригэр киирэн биһиги оҕолорбут — Николай Копырин бастаата, ону таһынан үрүҥ көмүс уонна боруонса мэтээллэри эмиэ ыллыбыт. Эһиил ахсыһын ыытыллар сайыҥҥы оонньуулары Дьокуускайга ыытыахпыт. Мин Кузбааска кэлэ сылдьар сыалым-соругум оҕолору өйөөһүн эрэ буолбакка, тэрээһин өртүн көрүү-истии, уопут ылыы буолар. Манна волонтердар үлэлэрин хайҕаатым. Аны туран спортсменнары олохтообут сирдэрэ, аһылыктара барыта үрдүк таһымнаахтык тэриллибит диэн бэлиэтээтим. Манна бэйэ-бэйэтиттэн балай даҕаны тэйиччи сытар биэс сиринэн оонньуулар ыытылыннылар. Ол аайы барытыгар табыгастаах гына тырааныспары, түһэр, тохтуур сири тэрийбиттэр.

Манна даҕатан суруйдахха, кыһыҥҥы үһүс оонньуулар ханна ыытыллаллара биллибэт. Билиҥҥитэ чуолкай быһаарылла илик эбит.

Хаартыскаҕа Евгений Горбачев, Дмитрий Ярощук түһэриилэрэ,

«Азия оҕолоро» пресс-кииниттэн.