Кузбааска «Азия оҕолоро» үөрүүлээх арыллыыта буолла

Бүгүн, олунньу 25 күнүгэр, Кемерово куорат «Кузбасс» муус дыбарыаһыгар «Азия оҕолоро» спортивнай кыһыҥҥы иккис оонньуулар үөрүүлээх быһыыга-майгыга саҕаланнылар.

Арассыыйа былааҕын күөрэччи көтөҕүү, дэлэгээссийэлэр парааттара, олимпийскай чөмпүйүөн Евгений Плющенко, олимпийскай призер Александра Трусова кыттыылаах «Кыайыыга кынаттаныы» мууска шоу «Азия оҕолоро» спортивнай оонньуулар үөрүүлээх арыллыытын көрө кэлбит биэс тыһыынчаттан тахса киһини соһутта, үөртэ, сөхтөрдө.

Арыллыыны олимпийскай чөмпүйүөн Алексей Ягудин уонна биллэр теле-ыытааччы Наталья Литовко ыыттылар.

Сибиирдээҕи федеральнай уокурукка РФ Бэрэсидьиэнин боломуочуйалаах бэрэстэбиитэлэ Анатолий Серышев, РФ успуордун миниистирэ Олег Матыцин, Арассыыйа Олимпийскай кэмитиэтин бэрэсидьиэнэ Станислав Поздняков, «Азия оҕолоро» норуоттар икки ардыларынааҕы кэмититэт бэрэсидьиэнэ Владимир Максимов, Кузбаас губернатора Сергей Цивилев кыттыыны ыллылар, эдэр спортсменнары эҕэрдэлээтилэр, ситиһиилэри баҕардылар.

Кыһыҥҥы оонньууларга кытта диэн Кузбааска 12 дойду спортсменнара муһуннулар: Армения, Афганистан, Беларусь, Казахстан, Кыргызстан, Кувейт, Ливан, Таджикистан, Таиланд, Туркменистан, Узбекистан уонна Арассыыйа (Башкортостан, Уһук Илиҥҥи федеральнай уокурук, Москва, Саха сирэ, Сибиирдээҕи федеральнай уокурук, Татарстан, Ураллааҕы федеральнай уокурук уонна Кузбаас хамаандалара).

Арыллыы кэмигэр оонньуулар былааҕын биллэр-көстөр эдэр спортсменнар аренаҕа киллэрдилэр. Олор истэригэр Кузбаас спортсмена, чэпчэки атлетикаҕа ааспыт сайыҥҥы оонньуулар чөмпүйүөнэ Марк Асмус, 2019 сыллааҕы бастакы кыһыҥҥы спортивнай оонньуулар фигурнай хаҥыкалааһыҥҥа кыайыылааҕа Ксения Синицина, буулдьанан ытыыга араас таһымнаах күрэхтэһиилэр кыайыылааҕа Ариадна Панчук уо.д.а. бааллар.

Уус Алдантан Василий Парников салайааччылаах “Кэнчээри” оҕо норуодунай ансаамбыла «Азия оҕолоро» өрөгөй ырыатын толордо:

Оттон кыттааччылар бары ааттарыттан хайыһарга Арассыыйаҕа бастыыр иһин күрэхтэһии призеругар, Кузбаастааҕы олимпийскай резервэ оскуолатын спортсменката Виктория Ефимова харда тылы этэн, чиэһинэй уонна ситиһиилээх оонньууну көрдөрүөхпүт диэн андаҕар тылы эттэ.

Оонньуулар уоттарын хаҥкылааһыҥҥа икки төгүллээх олимпийскай чөмпүйүөн Евгений Плющенко, хаҥкылаан сүүрүүгэ Олимпиада боруонса призера Наталья Шиве, гректии-римнии тустууга үс төгүллээх олимпийскай чөмпүйүөн Александр Карелин, хаҥкылаан сүүрүүгэ Арассыыйа үрүҥ көмүс призера Виктория Федорова уонна хайыһарга үс төгүллээх олимпийскай чөмпүйүөн Елена Вяльбе уматтылар.

Үөрүүлээх тэрээһини аан дойдутааҕы таһымнаах «сулус»-спортсменнар, хаҥкыһыттар — Олимпиада икки төгүллээх кыайыылааҕа Евгений Плющенко уонна Олимпиада үрүҥ көмүс призера Александра Трусова киэргэттилэр.

Бүгүҥҥүттэн кулун тутар 5 күнүгэр диэри эдэр спортсменнар успуорт кыһыҥҥы уон көрүҥэр күөн көрсүөхтэрэ. Манна даҕатан суруйдахха, бүгүн хоккейга Саха сирин сүүмэрдэммит хамаандата Кузбаас хамаандатын бастакы оонньууга кыайары ситистэ.

Дмитрий Ярощук, Евгений Горбачев хаартыскаҕа түһэриилэрэ.

«Азия оҕолоро» пресс-кииниттэн.