Ытык дьоммутугар анаммыт кинигэ иккис туома күн сирин көрдө!

Быйыл дойдубут дьоно-сэргэтэ Аҕа дойду Улуу сэриитигэр Кыайыы 80 сыллаах өрөгөйдөөх үбүлүөйүн бэлиэтиибит. Бу бэлиэ сыл биһиэхэ, хас биирдиибитэр олус чугас уонна күндү.

Дойдубут Бэрэсидьиэнэ Владимир Владимирович Путин Аҕа дойдуну көмүскээччи, Сахабыт сирин Ил Дархана Айсен Сергеевич Николаев Ийэ дойдуну көмүскээччи сылынан биллэрбиттэрэ.

«Кыа хааннарын тоҕон, хорсуннук сэриилэһэн» кинигэ бастакы туома «Үлэ күүһэ» хаһыат эрэдээксийэтигэр оҥоһуллан Новосибирскай куоракка 300 экземпляр тиражтаах 2015 сылга, Кыайыы 70 сылыгар тахсыбыта. Быйыл, Кыайыы 80 сылыгар кинигэ иккис туома оҥоһуллан, РФ Оборонатын министиэристибэтин Киин архыыбын докумуоннарыгар олоҕуран таҕыста.

Кинигэни улууспут ытыктанар суруналыыһа, төрөөбүт кыраайы үөрэтээччи Василий Ильич Алексеев хомуйан оҥордо. Кинигэ «Горнай улууһа» муниципальнай оройуон дьаһалтатын көҕүлээһининэн, үбүлээһининэн бэчээттэннэ. Сураҕа суох сүппүттэри, наҕараадалаахтары булаттаан быһаччы көмөнү оҥорон, патриот дьоммут, Бэрдьигэстээхтэн Юрий Платонов, Кировскайтан Василий Дьячковскай үлэлэспиттэр. Хас биирдии хорсун буойуну сырдатар ахтыылар, быһаарыылар кинигэҕэ киирбиттэр.

Бүгүҥҥү дьоллоох олохпут туһугар тыыннарын толук уурбут, дьоруойдуу сэриилэспит биир дойдулаахтарбыт ааттарын улууспут кэлэр кэнчээри ыччаттара умнубакка өйдүү-саныы сылдьыахтарыгар эрэлбит улахан. Суруллубут – суоруллубат. Үйэ-саас, киһи-аймах историятыгар хаалар.

Мария Павлова,

Бэрдьигэстээх, Горнай.

Ааптар хаартыскаларга түһэриитэ