Кыайан утуйбат буоллаххына

Киэһэ өр иистэнэн, хойукка диэри тэлэбииһэр көрөн, кинигэ ааҕан баран, киһи уута кэлиминэ эрэйдэнэр.

Аанньа утуйбатах киһи сарсыарда нэһиилэ туран үлэлии барар. Киһи түүн ортотугар диэри утуйбут уута саамай туһалаах.  Ол иһин киэһэ 22.30 ч. хойутаабакка утуйарга дьулуһуҥ.

Утуйар хоһу салгылатан, эбэтэр сылаас кэмҥэ түннүк бордууһунатын аһан баран утуйуллуохтаах. Утуйаары сытан кинигэ аахтахха, эбэтэр олус долгутуулаах киинэни көрдөххө, киһи уута алдьанар. Түүн утуйарга кэтэр таҥас бэйэҕэ табыгастаах, сымнаҕас буолуохтаах. Утутар эми иһэ охсорго дьулуһумаҥ. Эмкэ үөрэнэн хааллаххытына кэлин онто суох сатаан утуйбат буолан хаалыаххытын сөп.

Кыайан утуйбат киһи киэһэ ороҥҥо сытыан иннинэ  1 ч.нь. мүөттээх 1 ыстакаан сылаас үүтү иһэрэ ордук. Ону таһынан утуйуох иннинэ  таһырдьа тахсан чаас аҥаара оргууй аҕай хаамар, күүлэйдиир олус туһалаах.

Саха ыалын халандаарыттан, 2015 с.