Кыайыы 80 сылыгар аналлаах “Сэргэ курус сэһэнэ” хоһоон

А.С.Данилова аатынан “Барҕарыы” култуура киинэ уонна Өктөмнөөҕү норуот тыйаатыра Аҕа дойду Улуу сэриитигэр Кыайыы 80 сылын көрсө “Кыайыы. Чиэс. Өйдөбүл” диэн хоһоонньуттар өрөспүүбүлүкэтээҕи тэйиччиттэн күөн күрэстэригэр Гран-при үрдүк ааты ылбыт Мария Поскачина “Сэргэ курус сэһэнэ” хоһоонун билиһиннэрэбит.

Сэргэ курус сэһэнэ

Мин кэллим эйиэхэ, тапталлаах дойдубар,

Кыайыы ыһыаҕын ытык күнүгэр.

Өбүгэм таҥаһын маанытык  таҥнаммын,

Сахалыы  сиэринэн сэмэйдик туттаммын.

 

Үөрүүгэ кыттыһан дьоллонон ааһаары,

Алгыстаах сэргэҕэ салама баайаары.

Кырылыы кыынньыбыт биэ үүтэ кымыһы

Сахалыы чороонтон омурдан ылаары.

 

Киириигэ киэргэнэн  сэргэлэр турбуттар

Кынтайан-кылбайан кэрэ кыыс курдуктар.

Күн уотун иҥэрэн, көмүстүү күлбүттэр,

Хас биирдии ыалдьыты уруйдуу туойбуттар.

 

Ойуччу самнайан аар сэргэ турара,

Тулалыыр үөрүүгэ кыттыспат курдуга.

Өр күүтэн сылайбыт, эрэлин сүтэрбит,

Санааҕа баттаппыт кырдьаҕас курдуга.

 

Туохтан мунчаардыҥ, эн кэпсээ, Аар сэргэ,

Үөрүүлээх күн эбээт, бу бүгүн бар дьоҥҥор.

Алгыстаах салама  баайыллан сандаарда,

Чорооҥҥо кырылыыр кымыспыт оргуйда.

 

Онуоха эппитэ Аар сэргэ оргууйдук-

Сүрэхпэр  курдары тиийэрдик, курустук,

Үс куппун кутурҕан санааҕа куустаран

Көмүскэм уутун иэдэспэр сүүрдэн.

 

Оҕолоор, эһиги эдэрдэр, умнумаҥ,

Хайдахтаах үлүгэр сүтүгү сүктэрэн,

Уот сэрии иэдээнэ бу сиргэ бүппүтүн,

Хара дьай санаата имири сүппүтүн.

 

Эһиги мин курдук дьылҕаны көрсүмэҥ,

Эдэркээн киһи сэрииттэн төннүбэт ыйааҕынан,

Уот сэрии хонуутугар хааларын биттэнэн,

Эргиллибэт айаныгар атаарары, билимэҥ.

 

Билимэҥ эһиги, оҕону сүтэрбит ийэлэр

Кэрэгэй дьылҕаларыттан кэлэйиилэрин,

Бар дьонтон кистээннэр сэргэҕэ кэлэннэр,

Сулана ытааннар көҕүстэрин кэҥэтэллэрин.

 

Тапталлаах оҕом эргиллиэ диэн эрэнэн

Кыһыҥҥы томороон тымныы күннэргэ,

Сайыҥҥы өҥүрүк куйаастаах кэмнэргэ,

Ырааҕы одуулуу иһийэн туралларын.

 

Аҕыс уон сыл ааста, ол Кыайыы күнүттэн,

Ытабыл булкаастаах өрөгөй түгэнтэн.

Сүтүктээх ийэлэр бу сиртэн бардылар,

Кэтэһии кэриэһин санныбар сүктэрэн…

 

…Хараастан турбутум Аар сэргэ аттыгар,

Сэргэ курус кэпсээниттэн бөтө бэрдэрэн,

Ол эрэн алааспар төннөр түгэннэрбэр,

Киһини  кэтэһэр күүс баарыгар эрэнэн.

 

Ол иһин этэбин эһиэхэ, эдэрдэр,

Ытык сэргэлэр дьылҕалаах эбиттэр,

Эйэлээх олоҕу харыстааҥ дуу, диэннэр,

Сахалыы үс кукка алгыһы этэллэр.

Мария ПОСКАЧИНА.