Кыайыы 80 сылыгар Саха сирин буойуннарын ааттарын үйэтитиэхтэрэ

Аҕа дойду Улуу сэриитигэр кыттыбыт Саха сирин олохтоохторун ааттарын үйэтитэр туһунан Саха сирин Ил Дархана Айсен Николаев «Саха сирэ, иннин диэки!» биэриигэ «Якутия24» , «Саха» НКИХ уонна «Тэтим» ханаалларыгар кэпсээтэ.

«Улуу Кыайыы 80 сылын дьоһуннаахтык бэлиэтээһин — бу биһиги ытык иэспит. Өрөспүүбүлүкэҕэ, дойдуга бүттүүнүгэр улахан үлэ ыытыллар. Тутаах хайысхалар ортолоругар — биһиги буойуттарбытыгар анаммыт пааматынньыктары көрүү-истии, бэрээдэктээһин. Өрөспүүбүлүкэҕэ хас биирдии нэһилиэккэ уонна куоракка 700 маннык миэстэ баар. Балары көрөбүт. Үөрэнээччилэр, кэллиэстэр, үрдүк үөрэх кыһаларын устудьуоннара бу наадалаах дьыалаҕа ылыстыннар»,— диэтэ Айсен Николаев.

Өрөспүүбүлүкэҕэ кэнники икки сылга Аҕа дойду Улуу сэриитин кыттыылаахтарыгар уонна тыыл үлэһиттэригэр анаммыт 120 пааматынньыгы сөптөөх көрүҥнэнэрин ситистилэр. 2025 сыл ыам ыйыгар өссө 33 мемориальнай эбийиэги тупсаҕай көрүҥнүөхтэрэ.

Быйылгыттан «Бастакылар хамсааһыннара» Дьокуускайга, Покровскайга,Мэҥэ Xаҥалас улууһугар пааматынньыктары өрөмүөннээһиҥҥэ уонна тупсарыыга кыттыаҕа.

Ил Дархан Саха сирэ көҕүлээбит «Бастионы памяти» бырайыакка болҕомтону туһаайда.
«Бу бырайыак Саха сирин дьоно Аҕа дойду Улуу сэриитин кэмигэр кыргыспыт уонна дьоруойдуу охтубут миэстэлэригэр мемориаллары тэрийиигэ ананар.Быйыл дойду түөрт уобалаһыгар — Калуга, Смоленскай Псковскай уонна Волгоградскай уобаластарга — маннык комплекстар тэриллиэхтэрэ. Бу эрэгийиэннэр салалталара бырайыаны өйөөтүлэр, учаастактар бэрилиннилэр, эскиһэ талылынна уонна мемориаллары тутуу үлэтэ ыытыллыаҕа»,— диэтэ Ил Дархан.

Саха сирин буойуннара ааттаах билиитэлэр Новгород уобалаһын Наговскай сэлиэнньэтигэр «Воинам-якутянам — защитникам Старорусского района» пааматынньыкка баар буолуохтара.
«Бу эрэгийиэннэргэ олорор Саха сирин дьонун, Саха сирин тэрилтэлэрин кыттыыларынан, Москваҕа өрөспүүбүлүкэ Бастайааннай бэрэстэбиитэлистибэтин сүрүннээһининэн, бу үлэлэр болдьоҕор уонна хаачыстыбалаахтык толоруллуохтара.Бу биһиги Кыайыыбыт туһунан история өйдөбүлүн харыстааһыҥҥа дьоһун суолталаах»,— диэтэ Айсен Николаев.

Саха сирин уотугар 746 пааматынньык, стела, обелиск, бюст, умуллубат уот, байыаннай тиэхтньикэ образеһа бааллар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата