Кыайыы 80 сылыгар Тандаҕа бэртээхэй бырайыагы үлэлэтэллэр

Уус Алдан улууһун Байаҕантай нэһилиэгэр  Улуу Кыайыы 80 сылынан «80 Албан аат күннэрэ» аахсыйа чэрчитинэн, «Биһиги дьиэ кэргэн өйдөбүнньүгэ» бырайыак үлэлиир.

Бу бырайыакка Кыайыыны уһансыбыт дьону үйэтитэн, дьиэ кэргэттэр эһэлэри-эбэлэрин туһунан сырдаталлар, олорбут дьиэлэригэр мемориальнай дуоскалары арыйаллар, быыстапкалары туруораллар, күрэстэри ыыталлар, ахтыы киэһэлэрин тэрийэллэр.

Бастакы Өйдөбүнньүк күн Аҕа дойду Улуу сэриитин арҕаа фронун кыттыылааҕа, сэрии, үлэ бэтэрээнэ, Байаҕантай нэһилиэгэр сибээс эйгэтигэр уһун кэмҥэ үтүө суобастаахтык үлэлээбит Петр  Гаврильевич Васильевка анаммыта. Онно кини оҕолоро, сиэннэрэ, аймахтара кэлэн, кыттыбыттара, тэрийбиттэрэ.

Иван Готовцев аатынан Тандатааҕы устуоруйа-архитектура түмэлин сэбиэдиссэйэ Лидия Слепцова кэпсээбитинэн, нэдиэлэ аайы барыта 6 дьиэ кэргэн кытынна. Балаҕан ыйыгар диэри, бу бырайыак чэрчитинэн, маннык Өйдөбүнньүк күннэрэ ыытылла туруохтара. Манна Бэтэрээннэр сэбиэттэрэ көхтөөх кыттыыны ылар.

Танда 4 Дьоруойдааҕынан биллэр. Түмэлгэ кинилэргэ анаммыт бастайааннай эскпозициялар үлэлииллэр. Тандатааҕы устуоруйа-архитектура түмэлин пуондата 8,7 тыһыынча эспэнээттээх. Нэһилиэк устуоруйатын, култууратын, этнографиятын сырдатар баай пуондалаах түмэл буолар.

Улуу Кыайыыны уһансыбыт, эйэлээх олох олугун уурбут, нэһилиэк олоҕо тупсарын туһугар үйэлэрин тухары үтүө суобастаахтык үрүлүйэ үлэлээбит туруу үлэһит, улууска да, өрөспүүбүлүкэҕэ да биллэр-көстөр дьон элбэх. Кинилэр ааттарын үйэтитэргэ бэртээхэй бырайыагы толкуйдаан, үлэлэтэллэр.