Кыайыы 80 сылынан Кирилл Бычков тыыл бэтэрээнэ Мария Гусеваҕа мэтээл туттарда

Нерюнгри оройуонугар оробуочай сырыытын чэрчитинэн СӨ Бырабыыталыстыбатын бэрэссэдээтэлэ Кирилл Бычков тыыл бэтэрээнэ Мария Гусеваҕа “1941-1945 сс. Аҕа дойду Улуу сэриитигэр Кыайыы 80 сыла” мэтээли туттарда.

Мария Семёновна билигин 93 саастаах. Аҕа дойду Улуу сэриитин саҕаланыытыгар кыыс 10 саастаах этэ. Аөата Приморье кыраайыгар фроҥҥа барбыт. Мария Гусева 7 кылааска үөрэҕин быраҕан, ийэтигэр көмөлөспүтэ. Кинини кытта кыһыл көмүһү хостуур шахтаҕа кыһыл көмүһү көрдүүргэ уонна хостооһуҥҥа аналлаах лотуоктары сууйаллара. Көмүс байыаннай наадаҕа барара.

“Эйиэхэ Улуу Кыайыы 80 сылыгар аналлаах өйдөбүнньүк мэтээли туттарарбын көҥүллээ. Бу күн  сэрии ыар сылларыгар үлэҕит иһин махтал тылларын этиэхпин баҕарабын. Эһиги тыылга үлэҕитинэн уонна фроҥҥа көмөҕүтүнэн Улуу Кыайыы ситиһиллибитэ. Мэтээл — инники кирбиигэ сэриилэспит дьону эрэ буолбакка, саллааттары өйөөн, урусхалламмыт куораттары чөлүгэр түһэрэн, экэниэмикэни өрө көтөҕөн, култуурунай үгэстэри харыстаан үлэлээбит дьону эмиэ үйэтитэр өйдөбүнньүк бэлиэ буолар», — диэн Кирилл Бычков эттэ.

Мария Семёновна Красноярскай кыраай Алгаши сэлиэнньэтиттэн төрүттээх. Дьиэ кэргэнинээн 1935 сыллаахха Дьокуускайга, онтон 1939 сыллаахха Алдаҥҥа, “Удачнай” сопхуоска көспүттэр. Бэтэрээн дьиэ кэргэнэ 1958 сыллаахха Чульмаҥҥа көһөн кэлбит, 60-тан тахса сыл онно олорбуттар диэн иһитиннэрэр Ил Дархан, бырабыыталыстыба пресс-сулууспата.