Кыайыы 80 сылынан утумнаах үлэ бара турар

Ил Дархан быһа эпииргэ өрөспүүбүлүкэҕэ Кыайыы 80 сылынан утумнаах үлэ бара турарын кэпсээтэ.

Сыл саҕаланыыта 13000 кэриҥэ киһи төлөбүрү барытын туппуттара, Аҕа дойду Улуу сэриитин бэтэрээннэрэ 2 мөл. солк. ылбыттара. Бары категорияларынан Кыайыы 80 сылынан үбүлүөйдээх мэтээли туттардылар, билигин өрөспүүбүлүкэ бэлиэтин туттара сылдьаллар.

Дьокуускайга Кыайыы күнүгэр Өлбөт үйэлээх полк хаамыаҕа, икки улахан өйдөбүнньүк аһыллыыта буолуоҕа: сахалартан бастакы  Сэбиэскэй Сойуус Дьоруойугар Федор Поповка уонна Гавриил Протодьяконовка. Ыам ыйын 7 күнүгэр “Килбиэннээх үлэ куората” бэлиэни ылбыппытынан стела туруоруохпут.  Порт түөлбэтигэр саҥа храм үлэҕэ киириэҕэ.

Биһиги ыччаппыт Аҕа дойду Улуу сэриитигэр сэриилэһэ сылдьан, сураҕа суох сүппүт саллааттары көрдүүр үлэҕэ куруук кыттыһар. Мапннык үлэ түмүгүнэн Булгунньахтаах ыччата Илья Алексеев кырамтата көһүннэ. Быйыл Кыайыы бырааһынньыгын кэмигэр дойдутугар илдьэн уҥуоҕун тутуохпут.

Саха дьоно сэриилэспит сирдэринэн мемориаллары туруорар үлэбитин салгыыбыт. Быйыл түөрт эрэгийиэҥҥэ туруоруохпут. Бэс ыйыгар Сталинградка Мамай кургааныгар биһиги өрөспүүбүлүкэбит  мемориальнай комплекса баар буолуоҕа. Бу үлэ салгыы салҕаныаҕа”, — диэтэ Ил Дархан.