«Кыайыы дьыктаана» 864 былаһаакканан тэриллиэҕэ

Саха сиригэр «Кыайыы дьыктаана» быйыл муус устар 26 күнүгэр ыытыллара былааннанар.

Саха сирин үрдүнэн бу сыалга барыта 864 былаһаакка тэриллиэҕэ. Бу туһунан «Биир Ньыгыл Арассыыйа» баартыйа «Устуоруйа өйдөбүнньүгэ» бырайыагын координатора  Саргылана Неустроева кэпсээтэ.

«Устуоруйа өйдөбүнньүгэ» баартыйа бырайыага патриотическай иитиигэ туһуламмыт элбэх бырагыраамалары олоххо киллэрэр, ол иһигэр «Кыайыы дьыктаана» норуоттар икки ардыларынааҕы аахсыйаҕа тиийэ уларыйбыта.

Аан бастаан маннык тэрээһин 2019 сыллаахха ыытыллыбыта, оччолорго Аҕа дойду Улуу сэриитин Кыайыытын 74 сылын бэлиэтээбиппит. Былырыын бырайыакка 46 дойду уонна 1,8 мөл. киһи кыттыбыта биллэр. «Аахсыйаҕа Сахабыт сирин олохтоохторо мэлдьи көхтөөхтүк кытталлар. Быйыл Саха сиригэр 864 былаһаакканы арыйан үлэлэтиэхпит. Өрөспүүбүлүкэбит үс сыл устата бу аахсыйаҕа кыттааччылар ахсааннарынан бастакы миэстэни ылар. Устуоруйата суох дойду суох эбээт. Биһиги Аҕа дойду Улуу сэриитин Кыайыытын мэлдьи өйдүөх уонна ытыктыах тустаахпыт», — диэн Саргылана Неустроева бэлиэтиир. «Ахсыйаҕа кыттарга былаһааккалар ханна тэриллибиттэрин «Кыайыы дьыктаана» саайка билсиэххэ сөп», — диэн эрэгийиэн координатора эбэн эттэ.

Тэрээһин оскуола оҕолоругар, ыччакка, дойду олохтоохторугар уонна тас дойдуттан сылдьар ыалдьыттарга урукку кэм ыар сылларыгар дойдубут дьоруойдуу киирсиитин, дьиҥ устуоруйатын санатар, өйдөтөр уонна үйэтитэр суолталаах. Маны таһынан дьыктаан устуоруйаны, аатырбыт дьоруойдар хорсун быһыыларын төһө дьон билэрин тургутан көрөр аналлаах. Сорудаҕы толорорго 45 мүнүүтэ бэриллэр.

Санаттахха, «Кыайыы дьыктаана» аахсыйа өрөспүүбүлүкэ бары улуустарынан ыытыллар. Бастыҥнар дипломунан наҕараадаланаллар уонна үрдүк үөрэххэ киирэргэ эбии баал ылаллар.