«Кыайыы дьыктаана» сэттис төгүлүн ыытылынна

Муус устар 25 күнүгэр Дьокуускайга «Кыайыы дьыктаана» Бүтүн Арассыыйатааҕы аахсыйа сэттис төгүлүн ыытылынна.

Аахсыйа буолан ааспыт Улуу сэрии туһунан умнубакка, устуоруйаны токуруппакка, бары чахчылары кэпсиир, сырдатар сыаллаах ыытыллар.

Саха сиригэр бары улуустарга, куораттарга 900-чэ былаһаакка үлэлиир. Бу элбэх. Холобур, сэрии буолбут Волгоградскай уобаласка 283 былаһааккаҕа суруйаллар.

«Кыайыы дьыктаана» 2019 сылтан ыытыллар. Былырыын Арассыыйаҕа уонна атын дойдуларга 2 мөлүйүөн киһи суруйбута.

«Смарт» бибилэтиэкэҕэ бу күн биир саалаҕа толору киһи муһунна. Элбэх ыччат анаан кэлэрэ үөрдэр. Бэл, бланкалара тиийбэккэ, хос бэчээттээтилэр. Манна дьыктаан курдук суруйбаккын, Аҕа дойду сэриитин туһунан ыйытыыларга хоруйдуур тест толороҕун эбит. Гелевай уруучука, бланк биэрэллэр.
45 мүнүүтэ устата барыта 25 ыйытыыга хоруйдуугун. Быйылгы уратыта диэн, анал байыаннай дьайыы туһунан ыйытыылар киирбиттэр. Чиэһинэйдик эттэххэ, ыйытыылара ыарахаттар. Ол эрээри, бэйэни холонон көрөргө, устуоруйа чахчыларын хос үөрэтэргэ төрүөт буолар.