Кыайыы иһин бары бииргэ туруулаһабыт!

Байыаннай дьайыы саҕаламмыта үһүс сылыгар барда. Ол тухары Саха сирин амарах санаалаах, үтүө дууһалаах дьоно уолаттарбытыгар көмөлөрө уҕараабат. Улуустартан күн аайы кэриэтэ эт, кус, балык, ынах, сылгы иһэ, араас  бурдук астар хомуллан, тустаах сиргэ тиэрдиллэллэр.

Урут дьон ханна ыытан, тиксэрэн тиэрдэбит диир буоллахтарына, билигин хайдах, тугунан, ханна тиийэрин чопчу билэр. Дьокуускай куоракка Светлана уонна Владислав Лаврентьевтар-Диодоровтар дьиэ кэргэттэрин билбэт киһи аҕыйах буолуо. Бу дьиэ кэргэн олус улахан үлэни оҥоро сылдьар. Кинилэр улуустартан кэлбит гуманитарнай аһы-үөлү бэйэлэрэ сүүрэн-көтөн, астатан, ыраастатан, дьааһыктарга наардаталаан уган, суулаан, тырааныспары кэпсэтэн, дойду киин куораттарыгар баар волонтердарга ыыталлар. Салгыы волонтердар ону астаан, үллэртээн госпиталларга эмтэнэ сытар уолаттарга тарҕаталлар.

Бүгүн эмиэ Нам улууһуттан улахан көмө кэллэ. Соторутааҕыта Нам улууһун дьокутааттарын сэбиэтин бэрэссэдээтэлэ Алексей Винокуров Санкт-Петербурга тиийэ сылдьан волонтердары кытары көрсөн, атах тэпсэн олорон кэпсэтэн, уолаттар туруктарын билсэн баран, дойдутугар кэлэн бородуукта хомууругар аахсыйа биллэрбит. Үөрүөх иһин, Нам улууһун бары нэһилиэктэрэ, тэрилтэлэрэ туора турбакка, үтүө санаа аахсыйатыгар кыттыбыттар. Бүгүн 1,5 туонна аһы Светлана Диодороваҕа киллэрэн туттардылар.

«Бүгүн Нам улууһун дэлэгээссийэтэ икки массыынанан 1,5 туонна эт аҕалла. Бу барыта эт. Сороҕун эрийэн, сороҕун бэйэтинэн ыытыахпыт, уолттар төһө эрэ үөрэллэр. Куул аайы ханнык нэһилиэктэн кэлбитин, ыйааһынын суруйбуттар. Бу олус улахан көмө буолар. Нам улууһун дьокутааттарын сэбиэтин бэрэссэдээтэлэ Алексей Винокуров үтүө холобурун, көҕүлээһинин иһин махтанабыт. Нам улууһун үтүө санаалаах дьонугар-сэргэтигэр эмиэ барҕа махтал тылларын тиэрдэбит», — диэн Светлана Диодорова-Лаврентьева махталын этэр.

Оттон  Алексей Винокуров улууһун дьонугар-сэргэтигэр ыҥырыытын ылынан, көмө аахсыйаҕа кыттыспыттарыгар махталын тиэрдэр.

«Биһиги ыҥырыыбытын ылынан, анал байыаннай дьайыыга кытта сылдьар байыастарбытыгар уонна госпиталларга эмтэнэ сытар уолаттарыбытыгар көмөлөспүттэригэр махтанабын. Бу барыта госпиталларга тиийэхтээх. Оборуона министиэристибэтэ аһынан хааччыйар даҕаны, саха киһитэ бэйэтин төрүт төрөөбүт аһын аһаатаҕына, доруобуйата көнүө диэн санаалаахпыт. Биһиги Санкт-Петербурга бара сылдьан волонтердары көрсүбүппүт. Онно кинилэр госпиталларга сытар уолаттарга бэйэ аһын ыытаргыт буоллар диэн баҕа санааларын эппиттэрэ. Дойдубутугар кэлээт, аахсыйата тэрийиэххэ диэн быһаарыммыппыт. Светлана Диодорованы уруккуттан билэр буоламмыт, бу аҕалан туттардыбыт. Кыра да буоллар, Кыайыыга көмө буолуо диэн эрэллээхпит. Атын улуустарга биһиги бачыыммытын салҕаан уолаттарбытыгар көмөлөһүөххэйиҥ диэн ыҥырабын», — диэн Алексей Винокуров санаатын үллэһиннэ.