“Кыайыы көтөллөөх кэлэллэригэр эрэнэбит”

СПИД-ы уонна сыстыганнаах ыарыылары утары охсуһар  киин кэлэктиибэ байыаннай дьайыыга сылдьар биир дойдулаахтара бойобуой сорудаҕы толороллоругар УАЗ массыынаны биэрдэ.

Киин үлэһиттэрэ байыаннай дьайыыга сылдьар Арассыыйа байыаннайдарын өйүүр туһугар биир сомоҕо буоллулар. Ол курдук, хомуйбут харчыларынан УАЗ массыынаны атыыластылар.

Массыынаны ылбыт биир дойдулаахтарбыт: “Кыайыы биһиэнэ буолуоҕа”, —  диэн туран махталларын видеоҕа устан ыыттылар.

“Биһиги көмүскээччилэрбитигэр маннык өйөбүл дьоһун суолталааҕын билэбит. Бу массыына  тиэхиньикэ эрэ буолбатах – биһиги уопсай дьыалаҕа кылааппыт. Биһиги ыччаттарбытыгар эрэнэбит уонна кинилэр Кыайыы көтөллөөх кэлэллэригэр эрэнэбит”, — диэн СПИД-ы уонна сыстыганнаах ыарыылары утары охсуһар киин кылаабынай бырааһа Александра Золотарева иһитиннэрдэ.