Кыайыы күнүгэр анаммыт турнирга Саха сириттэн биэс бөҕөс кыттар

Ыам ыйын 5-7 күннэригэр Санкт-Петербург куоракка Аҕа дойду Улуу сэриитигэр Кыайыы 80 сылыгар анаммыт «Кыайыы күнэ» диэн көҥүл тустууга Бүтүн Арассыыйатааҕы турнир ыытыллар. Манна Саха сирин сүүмэрдэммит хамаандатыттан биэс тустуук кыттарын туһунан СӨ сүүмэрдэммит хамаандаларын бэлэмниир өрөспүүбүлүкэтээҕи киин иһитиннэрэр.

Арассыыйатааҕы турнир түһүлгэтигэр 57 киилэҕэ Федор Постников, 61 киилэҕэ Михаил Иванов, 79 киилэҕэ Николай Сивцев, 92 киилэҕэ Ньургун Сергин уонна 97 киилэҕэ Максим Толмачев тустуохтара.

Күрэскэ Тыва, Дагестан, Хотугу Осетия — Алания, Московскай, Новосибирскай, Ленинградскай, Калининградскай, Брянскай, Оренбургскай уобаластар, Ставропольскай кыраай уо.д.а. бөҕөстөрө кыттыахтара.