Кыайыы оһуокайыгар Ил Дарханныын

Саха Өрөспүүбүлүкэтин  Оһуокай уопсастыбата (салайааччы Александр Данилов) Кыайыы күнүгэр сыл ахсын  Кыайыы оһуокайын  тэрээһиннээхтик ыытар.

Кыайыы 78 сылыгар анаммыт Кыайыы оһуокайыгар күнүс 2 чаас 45 мүнүүтэҕэ диэри алгыстаах оһуокайбыт тохтоло суох дуораһыйда. Айылҕабыт кытта эҕэрдэлээбиттии, күммүт уота күндээрэн, бар дьоммутун үөртэ.

Оһуокай түһүлгэтигэр 27 этээччи эттэ. Эдэр устудьуон Айаал Быгынановтан саҕалаан, 96 саастаах Аар Дархан этээччибит Егор Михайлович Осипов, Нам улууһуттан Любовь Егорова аан бастаан түһүлгэлээн үөрдэ-көттө. Быйылгы Кыайыы оһуокайын уратытынан СӨ Ил Дархана Айсен Николаев Намтан киирэн эппит Дархан этээччи Валентин Хорунов оһуокайыгар кыттыста. Алгыстаах Кыайыы оһуокайын түһүлгэтин этээччилэрэ Кыайыы 78 сылынан бар дьону эҕэрдэлээн туран, киэҥ, модун Арассыыйабыт мэлдьи кыайыылаах-хотуулаах буоллун диэн алгыс тылларын эттилэр. Дархан этээччи Валентин Хорунов Ил Дархан Айсен Сергеевичкэ норуотун оһуокайыгар кыттыспытыгар махтанан туран,  үлэтигэр ситиһиини баҕарда. Дьэ ити курдук бииртэн биир кэрэ куолас солбуһан, Кыайыы оһуокайа алгыһынан амалыйан бар дьрн сүргэтин көтөхтө.

Марта Николаева