«Кыайыы реликвиялара» быыстапка аһылынна

Муус устар 30 күнүгэр Емельян Ярославскай аатынан түмэлгэ Кыайыы 80 сылынан «Реликвии Великой Отечественной…» диэн быыстапка үөрүүлээх аһыллыыта буолла.

Быыстапкаҕа улуустар мусуойдарыттан түмүллэн, сэрии, тыыл бэтэрээннэрин, сэрии кэмин оҕолорун тутта сылдьыбыт маллара, »Саха сирэ» хаһыат түмэлин эспэнээттэрэ, сэрии саҕана бэчээттэммит »Кыым» хаһыат нүөмэрдэрэ, буойуттар тустарынан суруйуулар, о.д.а. бааллар.
Сэрии бэтэрээннэрин тустарынан улахан альбом оҥоһулунна. Быыстапкаҕа кэлбит дьон бу альбому арыйан көрүөхтэрин сөп.

Норуот дьокутаата Александр Подголов мустубут дьону эҕэрдэлээтэ. Кини быыстапканы тэрийбит »Саха сирэ» хаһыат, »Сахамедиа» уонна түмэл үлэһиттэригэр махтанна. Буойун суруналыыстар кэриэстэрин өйдүүллэригэр, үйэтитэллэригэр махтанна.

— Быыстапка уларыйа, сыл устата эбиллэн, көрдөрүүгэ туруоҕа.

— Улахан үлэ ыытылынна. »Сахамедиа» иһинэн Судаарыстыбаннай бэчээт түмэлэ 2016 сылтан үлэлиир. Бэтэрээн суруналыыс Иван Ксенофонтов салайан үлэлэтэр. Аан дойдуга тыҥааһыннаах кэм, ааспыт устуоруйаны уларытыахтарын баҕараллар.

Ону бохсорго суруналыыстар күн бүгүн үлэлэһэллэр. Байыаннай кэрэспэдьиэннэр инники кирбиигэ баран, үлэлииллэр, сырдаталлар. Оттон Ярославскай аатынан түмэли кытта биһиги ыкса үлэлэһэбит, — диэн »Сахамедиа» генеральнай дириэктэрэ Виктор Колесов эттэ.

Гаврил Харлампьев, Саха сирин норуоттарын аудиовизуальнай нэһилиэстибэлэрин национальнай кииннэрин дириэктэрин солбуйааччы:

— Быыстапкаҕа биһиги кииммит кыттыспытыттан үөрэбит. Сэдэх киинэ хроникаларын көрдүүбүт, сыллара булабыт. Ол ону манна көрүөххэ сөп. Быыстапка улахан суолтата диэн үүнэр көлүөнэҕэ тиэрдии, сырдатыы буолар, — диэн эттэ.

Сэрии ыар сылларын докумуоннар, маллар туоһулууллар. Ол ону түмэллэр, хаһыаттар көрдөрөн, сырдатан, үйэтитэн, үлэлииллэр. Онон быыстапка суолтата улахан.

Быыстапкаҕа 500-тэн тахса мал аҕалыллан, көрдөрүүгэ туруоруллубут, ахсынньы бүтүөр диэри өссө уларыйа, эбиллэ туруоҕа.