“Кыайыы туһугар туруулаһар уолаттарбытыгар көмө оҥоһуллар”

Бүгүн өрөспүүбүлүкэ Ил Дархана Айсен Николаев Судаарыстыбаннай Мунньахха (Ил Түмэн) отчуоту иһитиннэрдэ.

Бу отчуоту истэн баран, “Туймаада” агрохолдинг” АУО генеральнай дириэктэрэ Петр Семенович Ефремов санаатын маннык үллэһиннэ:

— Бүгүн  өрөспүүбүлүкэбит Ил Дархана Айсен Николаев СӨ Судаарыстыбаннай Мунньаҕын (Ил Түмэн)  XIII (уочараттаах) пленарнай мунньаҕар кыттан, отчуоттаата. Ону Саха сирин олохтоохторо бары да истэн-билэн олордохторо. Айсен Сергеевич отчуотун байыаннай дьайыыга көмөлөһүүттэн саҕалаата. Бу маннык уустук кэмҥэ Кыайыы туһугар туруулаһа сылдьар уолаттарбытыгар көмө оҥоһулларын иһиттибит. Мин салайар тэрилтэм эмиэ байыаннай дьайыыга сылдьар уолаттарга ый аайы көмөлөһөбүт. Ил Дархаммыт ыытар бэлиитикэтин, үлэтин-хамнаһын дьокутааттар өйдүүллэрэ үчүгэй дии санаатым. Ону тэҥэ тыа хаһаайыстыбатыгар өрөспүүбүлүкэбит баһылыга үчүгэй болҕомтотун уурара улахан көмөлөөх. Быйылгы сылга үп-харчы сарбыллыбакка маннык тиийэ турдун.