Кыайыы туһунан хоһооннор хомуурунньуктара сүрэхтэннэ

Бүгүн, муус устар 30 күнүгэр, Дьокуускайга Емельян Ярославскай аатынан түмэлгэ “ӨЙДҮҮБҮТ, МАХТАНАБЫТ, КЭРИЭСТИИБИТ” хоһоон хомуурунньугун сүрэхтэниитэ уонна Кыайыы 80 сылынан «Реликвии Великой Отечественной…» диэн быыстапка үөрүүлээх аһыллыыта буолла.

Күнүс икки чаастан хомуурунньук сүрэхтэниитэ, хоһоон куонкуруһун кыайыылаахтарын наҕараадалааһын буолла.

«Саха сирэ» хаһыат кэлэктиибэ Ийэ дойдуну көмүскээччи сылыгар Кыайыыга дьулуһуу, патриотизм, эр санааланыы туһунан хоһооннору айыыга куонкурус биллэрбитэ. Бу күннэргэ кыттааччылар хоһооннорунан дьоҕус хомуурунньук кинигэ бэчээттэнэн таҕыста. Бу хаһыат эрэдээксийэтэ ыыппыт иккис куонкуруһа буолар. Бастакы хомуурунньук былырыын бэчээттэммитэ.

Куонкуруска 3-с миэстэни Егор Ноговицын-Силис Дьөгүөр ылла. 2-с миэстэни Туйаарыма Афанасьева ылла. Кыайыылааҕынан Ульянв Босикова буолла. Николай Нутчин »Биһирэбил бирииһинэн» бэлиэтэннэ.

Култуура, ускуустуба колледжын устудьуоннара хомуурунньукка киирбит хоһооннору дорҕоонноохтук аахтылар.

Оҕолорго Хатас оскуолатын 5 кылааһын үөрэнээччитэ Ярослав Степанов кыайыылааҕынан ааттанна.

— Кыайыы күнэ харах уулаах этэ. Ийэм кэпсиир этэ. Бу Кыайыы аан дойду устуоруйатыгар хаалбыта. »Саха сирэ» хаһыат куонкурус тэрийэн, өссө кинигэ таһааран, сүрдээх үчүгэй бырайыагы олоххо киллэрбитигэр махтанабын, — диэн кыайыылаах Альбина Босикова харда тыл эттэ.

— Олус үчүгэй куонкурус ыытылынна. Кыайыы 80 сыла ордук саастаах дьоҥҥо саамай улахан бэлиэ түгэн буолар. Аҕам аах 4 ини-бии буолан сэриигэ барбыттара, икки быраата кыргыһыы толоонугар хаалбыттара. Быраатын кытта эргиллэн кэлэн, элбэх оҕолонор, үлэлээн олорбуттара. Аҕабыт эрдэ олохтон бараахтаабыта. Ийэм сэрии кэмигэр тыраахтарыыстаабыта. Чурапчы улууһуттан биир бастакынан Сталин төбөлөөх мэтээли ылбыта. Сэттэ оҕону соҕотоҕун ииппитэ. Сэрии содулун оҕо эрдэхпититтэн билбиппит. Онон сир үрдүгэр сэрии буолбатын, эйэлээх олох туругурарын туһугар, оҕолорбут, сиэннэрбит сэрии алдьархайын билбэтигнэр диэн хоһооннорбун айбытым. Бириискэ тиксибиппиттэн соһуйдум, үөрдүм. Үйэм тухары агрономунан үлэлээтим. »Саха сирэ» хаһыат Ийэ сылыгар эмиэ куонкурус ыыппытыгар 2-миэстэ ылан турабын, — диэн Егор Ноговицын кэпсээтэ.

Бастакы хомуурунньукка киирбит хоһоонунан эстрада ырыаһыта Эрхаан ырыа гынан көтүппүтэ. Бу »Эр хоһуун хотойдор» ырыа Арассыыйатааҕы куонкуруска тиийэ биллибитэ. Эрхаан бу ырыаны ыллаабытын, ытыс тыаһынан көрүстүлэр. Баҕар, иккис хомуурунньуктан эмиэ ырыалар айыллан, куба буолан көтүөхтэрэ. Куонкуруска барыта 70-ча киһи кытынна.

«Сахамедиа» дириэктэрин солбуйааччы Чокуур Гаврильев эппитинэн, бу суруналыыстар Кыайыыга кылааппыт буолар.