«Кыайыы Знамята» Өймөкөөн улууһугар тиийдэ

Тохсунньу 29 күнүгэр Ил Дархан Айсен Николаев көҕүлээбит «Кыайыы Знамята» өрөспүүбүлүкэтээҕи эстэпиэтэ Өймөкөөн улууһун тымныы полюһугар тиийдэ.

Кыайыы бэлиэтэ аан дойду саамай тымныы сиригэр  Кыайыы 80 сылын бэлиэтиир лоп курдук 100 хонук иннинэ тиийбитэ кэрэхсэбиллээх. Улуус баһылыгын социальнай боппуруостарга солбуйааччы Оксана Назаренко уонна Прасковья Аммосова салайбыт Томпо уонна Өймөкөөн оройуоннарын дэлэгээссийэлэрэ Улуу Кыайыы бэлиэтин икки улуус кыраныыссатыгар көрүстүлэр.

Тэрээһин кыттыылаахтара «Кыайыы Знамята»  өрөспүүбүлүкэтээҕи эстэпиэтэ Ийэ дойду көҥүлүн уонна тутулуга суох буолуутун иһин турууласпыт байыастарга ытыктабыл бэлиэтэ буоларын кэпсээтилэр. Кинилэр эстэпиэтэ Улуу Кыайыы 80 сылыгар уонна дойдуга Аҕа дойду көмүскээччитин сылыгар, ону тэҥэ Саха сиригэр Ийэ дойдуну көмүскээччи сылыгар ыытылларын бэлиэтээтилэр. Эстэпиэтэ Саха сирин олохтоохторун дьоруойдуу уонна хорсун буолуу өйдөбүллэрин үйэтитиигэ түмэр.

Санаттахха, сыл саҕаланыаҕыттан эстэпиэтэ 9 улууска тиийбитэ: Мэҥэ Хаҥалас, Амма, Уус Маайа, Алдан, Уус Алдан, Чурапчы, Таатта уонна Томпо улуустарыгар. Өймөкөөн оройуонун кэнниттэн эстэпиэтэ Кэбээйи улууһугар туттарыллыаҕа. «Кыайыы Знамята» өрөспүүбүлүкэ бары оройуоннарыгар сылдьан, ыам ыйын 9 күнүгэр Дьокуускай куоракка тиийиэҕэ.