«Кыайыы Знамята» эстэпиэтэ Үөһээ Бүлүүгэ тиийдэ

Бүгүн, олунньу 17 күнүгэр, икки оройуон кыраныыссатыгар Кыайыы былааҕын үөрүүлээх туттарыы сиэрэ-туома ыытылынна. Үөһээ Бүлүү улууһун баһылыга Валерий Николаевка Кыайыы былааҕын Бүлүү улууһун баһылыга Сергей Винокуров туттарда.

««Кыайыы Знамята» устуоруйаҕа биир сомоҕо буолуу уонна ытыктабыл бэлиэтэ, ону тэҥэ Улуу Кыайыы 80 сылыгар аналлаах тэрээһиннэргэ бэлэмнэниигэ бастакы хардыынан буолар. Бүлүү оройуонугар үс Сэбиэскэй Сойуус Дьоруойа баар. Олунньу 13-17 күннэригэр ыытыллыбыт «Кыайыы Знамята» эстэпиэтэтигэр  улуус олохтоохторо көхтөөхтүк кытыннылар. Бу күннэргэ паамытынньыктарга сибэкки дьөрбөтүн, гирлянданы ууруу,  үөрүүлээх мунньахтар, сэрии уонна тыыл бэтэрээннэрэ, анал байыаннай кыттыылаахтара кыттаалаах истиҥ көрсүһүүлэр ыытылыннылар», – диэн Бүлүү олохтоохторо иһитиннэрдилэр.

Кыайыы былааҕа Үөһээ Бүлүү улууһугар туттарыллыбытын кэннэ оройуоҥҥа уһун эстэпиэтэ саҕаланна. Эстэпиэтэни бастакы көрсүбүт Харбалаах сэлиэнньэтэ буолар. Үөрүүлээх тэрээһин ааспыт субуотаҕа Ил Дархан Айсен Николаев арыйбыт И.Н. Барахов аатынан култуура киинигэр ытылынна.

Кыттааччылар Аҕа дойду Улуу сэриитин кыттыылаахтарын кэриэстээтилэр. Сэрии ыар сылларын, тыыл кэмигэр ыарахаттарын туһунан Харбалаах нэһилиэгин бочуоттаах олохтоохторо, тыыл уонна үлэ бэтэрээннэрэ Софья Филиппова уонна педагогическай үлэ бэтэрээнэ Розалия Филиппова ахтан-санаан үллэһиннилэр.

Тыл этээччилэр Кыайыы былааҕа мөлүйүөнүнэн дьон бэйэлэрин олохторун толук уурбуттарын бэлиэтэ буоларын, ону кытта анал байыаннай дьайыы кыттыылаахтарыгар кыайыыны баҕардылар.

«Кыайыы Знамята» салгыы Тамалакаан сэлиэнньэтигэр тиийиэҕэ.

Санатан эттэххэ, ахсынньы 28 күнүгэр Мэҥэ Хаҥалас улууһугар  саҕаламмыт «Кыайыы Знамята» эстэпиэтэ Дьокуускайга Кыайыы күнүгэр, ыам ыйын 9 күнүгэр, түмүктэниэҕэ.