Кыайыы Знамятын эстэпиэтэтэ — Хаҥалас улууһугар

 Олунньу 7-11 күннэригэр Хаҥалас улууһун нэһилиэнньэлээх пууннарыгар Кыайыы Знамятын эстэпиэтэтинэн тэрээһиннэр ыытыллаллар. Знамяны улууска намнар туттарбыттара.

Үөрүүлээх тэрээһин олунньу 7 күнүгэр «Саргы түһүлгэтэ» култуура уонна норуот айымньытын киинигэр буолбута.

Олунньу 8 күнүгэр Кыайыы Знамятын Иһиккэ, Кытыл Дьурааҕа, Үөдэйгэ, Сиинэҕэ, Тумулга, олунньу 9 күнүгэр Тиит Арыыга, Улахан Ааҥҥа, Булгунньахтаахха, Бэстээххэ уонна Мохсоҕоллооххо көрсүбүттэрэ. Бүгүн, олунньу 10 күнүгэр, Знамяны Хачыкаат, Күөрдэм, Тиит Эбэ, Нөмүгү, Уулаах Аан, Өктөм уонна Төхтүр олохтоохторо көрүстүлэр.

Эстэпиэтэҕэ Аҕа дойду уоттаах сэриитин уонна тыыл бэтэрээннэрэ, сэрии сылларын оҕолоро, бойобуой дьайыылар бэтэрээннэрэ, байыаннай дьайыы кыттыылаахтара, уопсастыбаннай түмсүүлэр чилиэннэрэ, оскуола үөрэнээччилэрэ, ыччаттар көхтөөх кыттыыны ылаллар.

Улахан Аан олохтооҕо Татьяна Гаврильевна Мордосова сэрии сылларын оҕото.

«Мин 90 саастаахпын. «Кыайыы Знамятын» эстэпиэтэтигэр кыттарбыттан наһаа үөрэбин, долгуйабын. Бу олус наадалаах тэрээһин, эдэр ыччакка Аҕа дойду Улуу сэриитин туһунан кырдьыгынан кэпсииргэ, биһиги аҕаларбыт, эһэлэрбит, хос эһэлэрбит дьоруойдуу быһыыларын сэһэргииргэ, тыылга үлэлээбит хоодуот санаалаах дьоннору сырдатарга, Улуу Кыайыыны хайдах уһансыбыттарын хайдах баарынан тиэрдэргэ. Мин бүгүн Кыайыы Знамятын тэрээһинигэр сылдьыбыт, кыттыыны ылбыт дьон бу күнү өйдүү-саныы сылдьалларыгар эрэнэбин«, — диир Татьяна Мордосова.

2 Малдьаҕар оскуолатын сэттис кылааһыгар үөрэнэр Богдан Слепцов знамяны арыаллааччылартан биирдэстэринэн буолла.

«Кыайыы Знамятын арыаллыырбыттан, тэрээһин кэмигэр бочуоттаах караулга турарбыттан улаханнык долгуйдум. Бу сүдү эппиэтинэс.  Бүгүҥҥү улахан тэрээһиҥҥэ кыттыбыт дьон тугу эппиттэрин болҕойон иһиттим«, — диир кини.

Бэстээх нэһилиэгин баһылыга Елена Делец «Кыайыы Знамятын» сыала-соруга устуоруйаны дьон билиитигэр-көрүүтүгэр тиэрдии,  өйдүү-саныы сылдьалларыгар уонна кэнчээри ыччакка тиэрдэллэригэр туһуланарын этэр.

«Дойдубут инники кэскилин туһугар турууласпыт ытык дьоммутун өйдүү-саныы сылдьыахпыт«, — диир Елена Делец.

Сарсын, олунньу 11 күнүгэр, Кыайыы Знамятын Горнай улууһугар туттарыахтара.

Эстэпиэтэ 12 улууска сырытта: Мэҥэ Хаҥаласка, Аммаҕа, Уус Маайаҕа, Алдаҥҥа, Нерюнгригэ, Уус Алдаҥҥа, Чурапчыга, Тааттаҕа, Томпоҕо, Өймөкөөҥҥө, Кэбээйигэ уонна Намҥа. Тэрээһин Улуу Кыайыы 80 сылыгар, Арассыыйаҕа Аҕа дойдуну, Саха сиригэр Ийэ дойдуну көмүскээччилэр сылларыгар ананар.

СӨ Ил Дарханын уонна Бырабыыталыстыбатын пресс-сулууспата

Хаартыска «Хаҥалас» хаһыатыттан