Кыайыы Знамятын Муомаҕа уруйдуу көрсөллөр

Кулун тутар 4 күнүттэн Кыайыы Знамятын эстэпиэтэтэ Муома нэһилиэктэринэн айанныыр.

Кыайыы өрөгөйдөөх бэлиэтин оскуола үөрэнээччилэрэ, уһуйаан оҕолоро киэн тутта, сөҕө, хайгыы көрөллөр. Кулун тутарг 4 күнүгэр Кыайыы Знамятын Орто Дойду нэһилиэгин дьоно-сэргэтэ уруйдуу-айхаллыы көрсүбүтэ. Олохтоохтор, үөрэнээччилэр иннилэригэр нэһилиэк баһылыга, бойобуой дьайыылар бэтэрээннэрэ, бэтэрээннэр сэбиэттэрин бэрэссэдээтэлэ тыл эппиттэрэ. Үөрэнээччилэр байыаннай ырыалары ыллаабыттара. Знамяны Төбүлэххэ оскуола эдэр армеецтарын этэрээтэ көрсүбүтэ.

Сарсыныгар, кулун тутар 5 күнүгэр, Индигир нэһилиэгэр Знамяны аҕалбыттара. Үөрэнээччилэр, учууталлар эрдэттэн бэлэмнэнэн көрсүбүттэрэ ураты тыыны биэрбитэ. «День Победы» ырыаны оскуола кэлэктиибэ толорон ньиргиппитэ.

Бүгүн, кулун тутар 6 күнүгэр, Кыайыы Знамятын Муома оскуолатыгар көрүстүлэр. Знамяны дьон-сэргэ толору мустубут саалатыгар эдэр армеецтар күөрэччи көтөҕөн киллэрдилэр. Кинилэр ортолоругар 11 кылаас үөрэнээччитэ Алексей Лушкин баар. Алексей хос эһэтэ, Кыһыл Сулус орден кавалера Александр Васильевич Рачинскай Аҕа дойду сэриитин бэтэрээнэ.

Сарсын, кулун тутар 7 күнүгэр, Кыайыы Знамятын Абый оройуонугар туттарыахтара.

Аахсыйа Мэҥэ Хаҥаласка, Аммаҕа, Уус Маайаҕа, Алдаҥҥа, Нерюнгригэ, Уус Алдаҥҥа, Чурапчыга, Тааттаҕа, Томпоҕо, Өймөкөөҥҥө, Кэбээйигэ, Намҥа, Хаҥаласка, Горнайга, Бүлүүгэ, Үөһээ Бүлүүгэ, Ньурбаҕа, Сунтаарга, Мииринэйгэ, Ленскэйгэ ыытылынна. Эстэпиэтэ ыам ыйын 9 күнүгэр түмүктэниэхтээх.

Кыайыы Знамятын эстэпиэтэтэ Улуу Кыайыы 80 сылыгар, РФ Аҕа дойдуну уонна Саха сиригэр Ийэ дойдуну көмүскээччилэр сылларыгар ананар.

СӨ Ил Дарханын уонна Бырабыыталыстыбатын пресс-сулууспата

Хаартыска: Муома улууһун дьаһалтатыттан