Кыайыыга аналлаах Үс Хатыҥ ыһыаҕа

Бэс ыйын 28-29 күннэригэр Үс Хатыҥ алгыстаах түһүлгэтигэр өрөспүүбүлүкэтээҕи  Оһуокай күрэҕэ икки күн устата тэрээһиннээхтик ыытылынна.

Быйылгы күрэх Кыайыы 80 сылыгар уонна САССР искусствотын үтүөлээх диэйэтэлэ, Аар тайҕа ырыаһыта, оһуокайдьыт С.А.Зверев-Кыыл Уола төрөөбүтэ 125 сылыгар ананан ыытылынна. Оһуокай өрөспүүбүлүкэтээҕи түмсүүтүн бэрэссэдээтэлэ А.Д.Данилов-Дьулуур Хаан баһылыктаах Тойон сүбэ үлэлээтэ. Икки күнү быһа этээччилэр түһүлгэлэри таһаарыыларын, хоһуйуутун, тэтими биэрээһини, тутууну көрөн сыаналаата. 56 этээччи суруйтарбытыттан 51 этээччи эттэ. Бүлүү бөлөх улуустарыттан, Мэҥэ Хаҥаластан, Намтан, Тааттаттан, Амматтан, Дьокуускайтан кэлэн кытыннылар.
Быйылгы күрэххэ аан бастаан оһуокайдьыттарбытыгар аналлаах балаҕан тутуллан силигэ ситтэ. Оһуокай түмсүүтүн салайааччыта Александр Джурович ыллыктаах туруорсуута өйөнөн, Дьокуускай куорат мээрийэтэ туттарбытыгар оһуокайдьыттар бары махтаннылар. Балаҕан иһигэр остуоллары, олорор ыскамыайкалары, араас тэриллэри булууга этээччилэр уонна Таатта, Нам түмсүүлэрэ харчынан көмөлөстүлэр. Сунтаардар сахалыы иһити утары ууннулар. Онон таһыгар төгүрүччү сэргэбит тула олорорго ыскамыайкалар, хаххалыыр аныгы бүтэй баар буолла. Урут сыралҕан куйааска аһаҕас халлаан анныгар тоҕуоруһар буоллахпытына, билигин көмүлүөк оһохтоох балаҕаннаах буоллубут.

Халлааммыт эмиэ сыралҕан итиитинэн, ардаҕынан, иккис күммүтүгэр сытыы тыалынан да сабыта оҕустар, алгыстаах түһүлгэ киэҥник тэнийдэ. Бар дьон Дархан этээччилэрбит, норуот уоһуттан түспэт, кэпсэлгэ сылдьар оһуокайдьыттарбыт Сунтаартан Кураһаай Мэхээлэ, Мэҥэ Хаҥаластан Виталий Никифоров, Стас Иванов о.д.а. түһүлгэлэртэн астыммыт буолуохтаах. «Саха» НКИХ кылаабынай редактора Альбина Тарабукина Дархан этээччи Виталий Никифоров түһүлгэтин ыраахтан истэн кэлэн дуоһуйа үҥкүүлэспититтэн махтанна.
Финалга 15 этээччи талыллан киирэн, тууйастан кумааҕы тардан, онно түбэспит теманан тутатына хоһуйда. Гран При аатын Тааттаттан үтүөлээх этээччи Афанасий Николаевич Попов ылан, 350 тыһыынча солкуобайдаах сертификатынан наҕараадаланна уонна Дархан этээччи үрдүк аатын сүктэ. Бастакы миэстэни Намтан үтүөлээх этээччи Семен Алексеев, иккиһи Бүлүүттэн үтүөлээх этээччи Мэҥкэр Сэмэн Хабырыыл уола, үсүһү Сунтаартан Дмитрий Кондратьев ылан,  сертификатынан наҕараадаланнылар.
Оһуокай өрөспүүбүлүкэтээҕи түмсүүтүн бэрэссэдээтэлэ А.Д.Данилов-Дьулуур Хаан, солбуйааччыта А.Л.Тарскай тэрилтэлэри кытары үлэһэн кыттыбыт этээччилэр, кынаттар сыаналаах сертификаттарынан наҕараадаланнылар. Онон Кыайыы 80 уонна улуу оһуокайдьыт Кыыл Уола- Сэргэй Сибиэрэп 125 сылыгар аналлаах Оһуокай күрэҕиттэн илии тутуурдаах, өттүк харалаах тарҕастылар.
Түгэнинэн туһанан кэнники икки сылга Таатта улууһугар Оһуокайга биллэр хамсааһын (Оһуокай түмсүү салайааччыта И.Иванов) тахсыбытын бэлиэтиир тоҕоостоох. Манна быйылгы Кылаан кыайыылаах Афанасий Николаевич Попов ыччаттары, оскуола оҕолорун кытары бииргэ түмсэн үлэлии сылдьаллар. Онон Бүлүү бөлөх, Мэҥэ Хаҥалас, Нам улуустарын оһуокайдьыттарын утумнарын туттулар.
Икки күн утуйбакка, атах үрдүгэр сылдьан сылайбытыҥ буолуо диэн ыйытааччы элбэх. Кырдьык, олус илистиилээх, ол эрэн Оһуокайым алгыстаах түһүлгэтэ арчылаата.

Марта Николаева