«Кыайыыга бииргэ!» өрөспүүбүлүкэтээҕи доброволецтар пуорумнара ыытыллар

Нерюнгри оройуонугар байыаннай дьайыы кыттыылаахтарын уонна кинилэр дьиэ кэргэттэрин өйүүр сыаллаах-соруктаах «Кыайыыга бииргэ!» диэн өрөспүүбүлүкэтээҕи доброволецтар пуорумнара ыытыллар. Пуорум ахсынньы ыйы быһа Ньурба уонна Майа курдук хас да нэһилиэнньэлээх пууннары хабан ыытыллыаҕа, оттон түмүктүүр үөрүүлээх сабыллыыта ахсынньы 20 күнүгэр Дьокуускайга буолуоҕа.

Пуорум аһыллыытыгар Саха Өрөспүүбүлүкэтин ыччат дьыалаларыгар уонна социальнай коммуникацияларга миниистирэ Петр Шамаев доброволецтар «тыылы уонна инники кирбиигэ сылдьар байыастары ситимниир быстыбат ситим» буолалларын эттэ. Кини волонтердар байыастары кынаттыылларын, кинилэргэ эрэли уонна эрэллээх буолууну бэлэхтииллэрин бэлиэтээтэ. Ону тэҥэ миниистир байыаннай сулууспалаахтарга көхтөөхтүк көмөлөһөр «Нерюнгри оройуонун волонтердарын куорпуһа» уопсастыбаннай тэрилтэҕэ махталын тириэртэ. Пуорум бырагыраамата киэҥ — кыттааччылар «Аҕа дойдуну көмүскээччилэр пуондатын» юристарыттан Уопсастыбаннай приемнайга юридическай консультациялары ылыахтара, #БИҺИГИБИИРГЭ волонтердарын аһаҕас кэпсэтиитигэр кыттыахтара, бастыҥ уопуттарын атастаһыахтара.

«Тыылы көмүскээһин: юридическай уонна психологическай ыарахаттар» диэн панельнай дискуссия былааннанар, онно бэтэрээннэргэ уонна байыаннай дьайыы кыттыылаахтарыгар тиһиктээх көмөнү оҥоруу боппуруостара дьүүллэһиллиэхтэрэ.

«Көмө биир кэлим фрона: түмүктэр уонна кэскил» диэн пленарнай мунньахха волонтердар хамсааһыннарын сайыннарыы стратегията уонна көмө көдьүүһүн үрдэтэр сыалтан, кэммиэрчэскэйэ суох тэрилтэлэр, биисинэс уонна судаарыстыба күүстэрин түмүү суоллара-иистэрэ билиһиннэриллиэҕэ. Пуорум ордук бастыҥ үлэлээх волонтердары уонна добровольческай тэрилтэлэри наҕараадалааһынынан түмүктэниэҕэ.

Добро.рф платформа дааннайынан, Саха сиригэр 39 тыһыынчаттан тахса волонтер регистрацияламмыт, кинилэр 2,8 тыһыынча кэриҥэ үтүө дьыаланы оҥорбуттар. «Саха сирэ эйигин кытта!» уопсастыбаннай тэрилтэ 2022 сыл саҕаланыаҕыттан  байыаннай дьайыы кыттыылаахтарыгар 123,8 туоннаттан тахса таһаҕаһы уонна 3,2 тыһыынчаттан тахса аадырыстаах баһыылканы ыыппыт, ыстаап үлэтигэр 2,8 тыһыынча волонтеры түмпүт.