Кыайыы ырыаларын толорон, сэргэх тэрээһини ыыттылар

Ыам ыйын 15 күнүгэр Таатта улууһун   Харбалаахтааҕы үөрэхтээһин холбоһугар Дьиэ кэргэн күнүгэр уонна Кыайыы 80 сылыгар аналлаах «Кыайыы ырыалара» диэн сэргэх тэрээһин буолан ааста.

Тэрээһини алын сүһүөх кылаастар учууталлара Владилена Ильинична Винокурова, Светлана Романовна Винокурова салайан ыыттылар.

«Дьиэ кэргэн күнэ» буолан, тэрээһини көхтөөх  төрөппүппүт Лидия Петровна Винокурова оҕолорун Ларигы, Ньургуйаананы, Славигы кытта «Тыыннаахтар умнубат сыллара» ырыанан арыйдылар. Салгыы 1-11 кылаастар үөрэнээччилэрэ бүтүн кылааһынан Кыайыыга аналлаах ырыалары ыллаатылар.  Тэрээһин салайааччылара хас биирдии ырыа айыллыбыт устуоруйатын кэпсээн, сырдатан испиттэрэ олус сонун буолла.

Холобур, 4 кылаастар ыллаабыт «Три танкиста» ырыалара 1938 сыллаахха суруллубут. Бу ырыаны бастаан артыыс Николай Крючков толорбут эбит.

Польша композитора Ежи Петербургскай айбыт вальсын муусукатыгар олоҕуран, Яков Галицскай, Михаил Максимов «Синенький скромный платочек» ырыа тылын суруйбуттар. Бу ырыа үстэ уларыйбыт эбит. Клавдия Шульженко сэрии толоонугар, госпиталларга ыллыырын байыастар олус сөбүлээн истэллэр эбит. Бу ырыаны 8-тар бэрт иэйиилээхтик ыллаатылар. Ити курдук, «Хайыһар», «Мин мантан сэриигэ барбытым», «Смуглянка» уо д.а. атын ырыалары оҕолор бэркэ ыллаатылар.

Түмүккэ, бүттүүн оскуоланан «Суох буоллун сэрии!» уонна «Пусть всегда будет солнце!» ырыаны 4 кылаас үөрэнээччитэ Клим Макаров таһаарыытынан ыллаан ньиргиттибит.

Салгыы «Удьуор утума» диэн дьиэ кэргэн хаһыатын быыстапкатын көрөн, тэрээһини түмүктээтибит.

Онон «Дьиэ кэргэн күнүн» ырыа доҕуһуоллаах олус бэркэ атаардыбыт.

Сонун тэрээһини бэлэхтээбит алын сүһүөх кылаастар бары учууталларыгар махтанабыт. Бырайыак эһиилги үөрэх дьылыгар өссө дириҥээн, сайдан иһиэн баҕарабыт

Лейла НИКОНОВА, В.С. КРИВОШАПКИНА, Таатта, Харбалаах

http://Кривошапкина