Кыайыыны уһансааччы  далбар хотуттар

Баҕа өттүнэн көмөлөһүү уопсастыба олоҕун быстыспат сорҕотунан буолбута син ыраатта диэххэ сөп, ону биһиги ордук хамсык дьаҥа турбут кэмигэр көрбүппүт-билбиппит. Оттон икки сыл анараа өттүгэр тыһыынчанан волонтер  байыаннай дьайыы кыттыылаахтарын өйүүр туһугар түмсүбүттэрэ. Саха сиригэр эмиэ байыаннай дьайыы саҕаланыаҕыттан амарах дууһалаах, үтүө санаалаах дьон түмсэн, туох баарынан көмөлөһө, үлэлии-хамсыы сылдьаллар.

Оннук биир үтүө дьыаланы оҥоро сылдьар «Боевые шелкопряды Якутии» уопсас­тыбаннай хамсааһын буолар. 2022 сыллаахтан  мобилизация саҕаланыаҕыттан, Марина уонна Сергей Васильевтар көҕүлээһиннэринэн байыаннай дьайыы кыттыылаахтарыгар баҕа өттүнэн көмөлөһүү саҕаламмыта. Дьокуускай куорат олохтоохторо бу үтүө бачыымы өйөөннөр «Шелкопряды Якутии» диэн ааттанан, сүрэхтэрин баҕатынан үлэлээн-хамсаан барбыттара. Кэлин бэйэлэрин хамсааһыннарын «Боевые шелкопряды Якутии» диэн ааттаабыттара.

Итинтэн ыла «Шелкопряды Якутии» хамсааһын кыттыы­лаахтарын күөстүү оргуйар үлэлэрэ саҕаламмыта. Кинилэр хамсааһыннарын Саха сирин бүттүүнэ өйөөн, билигин бары улуустарга хамсааһын тэни­йэн, биһиги байыастарбытыгар көмөлөһөллөр.

Тыылга – үлэ үөһүгэр

«Боевые шелкопряды Яку­тии» хамсааһын Саха сирин Национальнай бибилэтиэкэтигэр баар филиалын волонтердарын кытары кэпсэттим. Бу филиалы олоххо улахан уопуттаах, өрөспүүбүлүкэ  араас хамсааһын кыттыылааҕа, үлэ бэтэрээнэ Тамара Попова салайар. Кини 78 саастаах эрээри, үлэ-олох үөһүгэр сылдьар, сүүрэн-көтөн, сала­йан, барыларыгар холобур буолар киһи. Бу филиалга Тамара Дмитриевнаны кытары үлэ бэтэрээннэрэ, амарах сүрэхтээх далбар хотуттар Александра Попова, Екатерина Иванова, Вера Егорова,  Екатерина Иванова,  Лидия Алексеева, Мария Никифорова, Екатерина Попова, Мария Стручкова, Анастасия Горохова уо.д.а. үлэлииллэр.

Галина Захарова, Лена Фарафонова, Лена Никитина, Дина Охлопкова, Екатерина Иванова, Лидия Алексеева күн аайы үлэлэригэр курдук кэлэн көмөлөһөллөр. Марина Васильева волонтердары түмэр, үлэлэтэр хайысхаҕа Санкт-Петербурга үөрэммитэ. Оттон Сергей Васильев, физик-математик, ХИФУ Физико-тиэхиньиичэскэй факультетыгар үлэлиир. Сергей Ефимович «спандбонд» матырыйаалы үөрэтэн, таҥас фабрикатын кытта бииргэ үлэлэһэн, чэпчэки ыйааһыннаах, киһи этин-сиинин курдары көрдөрбөт таҥаһы оҥорон таһаарарга үлэлэспит үтүөлээх киһи. Бу таҥас аныгы кэмҥэ, байыаннай усулуобуйаҕа олус туһалаах, квадрокоптер да, пилота суох көтөр аппараат да курдары көрбөт. Онон маскировочнай сиэккэлэри кэлиҥҥи кэмҥэ бу матырыйаалтан оҥороллорун бэлиэтиир тоҕоостоох.

Кэргэнин  байыаннай дьайыыга сүтэрбит Валерия Дмитриева волонтердарга ситими сакаастаан көмөтө улахан. Кини бу хайысхаҕа туох баар кыһалҕалаах түгэни быһаа­рар, маркировкатыттан саҕалаан, төһө кэриҥнээҕэр, чэпчэтиитигэр, тиэйиллэн аҕалыллыытыгар тиийэ быһаарсар.

Оттон бэйэлэрин күүстэринэн, биэнсийэлэриттэн ордоруммут үптэрин-харчыларын хомуйуутун, харайыытын Мариянна Кузьмина кичэллээхтик дьаһайар, Вера Куниязова күнү быһа сылдьан үлэлиир волонтердарга астарын-үөллэрин хааччыйар, кини өссө хоту улуустар дьокутааттарын көмөлөһөөччүтүнэн үлэлиир.

Бибилэтиэкэрдэр үтүө дьыаланы өйүүллэр

Волонтердар биир ту­­таах киһилэринэн Раиса Коло­дезникова буолар. Кини Нацио­нальнай бибилэтиэкэҕэ кылаа­бынай бибилэтиэкэр, кини салалтаны кытары кэпсэтэн, волонтердар сылаас үлэлиир сирдээхтэр.

Бибилэтиэкэ үлэһиттэрэ үлэлэрин таһынан волонтердарга эмиэ көмө буолаллар. Кылаабынай бибилэтиэкэр Михаил Тихонов, бибилэтиэ­кэр Андрей Капустин эҥкилэ суох көмөлөһөллөр. «Боевые шелкопряды Якутии» уопсас­тыбаннай хамсааһын волонтердара туох баар кыһалҕа­лаах боппуруоһу быһаара сылдьаллар, оннооҕор сиэккэни баайарга туттар тэрили өрөмүөннээн биэрэр дириэктэри солбуйаач­чы Александр Игнатьевка барҕа махталларын этэллэр. Ону сэргэ ыҥырдылар даҕаны көмөҕө кэлэр Васса Павлованы, Прокопий Петрову, Айталина Егорованы бэлиэ­тииллэр.

Үтүө дьыаланы оҥоро сылдьар «Боевые шелкопряды Якутии» уопсастыбаннай хамсааһын буолар. 2022 сыллаахтан  мобилизация саҕаланыаҕыттан, Марина уонна Сергей Васильевтар көҕүлээһиннэринэн байыаннай дьайыы кыттыылаахтарыгар баҕа өттүнэн көмөлөһүү саҕаламмыта.

Волонтердар көхтөөх дьон

«Боевые шелкопряды Якутии» волонтердара олус көх­­төөх дьон. Кинилэр ба­­йыастарга көмөлөһөллөрүн таһынан араас быыстапкаларга, дьаарбаҥкаларга, атын да тэрээһиннэргэ күргүөмүнэн кытталлар. Оннооҕор бэйэлэрин биэнсийэлэриттэн ордорунан, харчы хомуйан матырыйааллары атыылаһарга тутталлар. Маскировочнай сиэккэни таһынан харысхаллары оҥороллор. Нашлемниктары уонна мөһөөччүктэри Люция Федорова, Дина Охлопкова, Туяра Мэлсовна, Марфа Дьячковская, Машенька Егорова ийэтин Агафия Михайловнаны кытары тигэллэр.

«Биһиэхэ элбэх киһи көмөлөһөр. Эрэкэлээмэ тэрилтэтэ значок, флажок оҥорорго көмөлөһөр. Оттон бастакы электрическэй кыптыыйбытын Дьааҥы улууһун түмсүүтүн бэрэс­сэдээтэлэ Ольга Прудецкая бэлэхтээбитэ. Иккиһи – «Швейный парк» маҕаһыын. Бүлүү улууһун Илбэҥэ нэһилиэгэр баар фи­­лиалбыт үлэтин бэлиэтиэхпитин баҕарабыт. Салайааччынан Ирина Жиркова үлэ­­лиир. Нэһилиэк баһылыга Егор Афанасьевич Николаев эмиэ улаханнык көмөлөстө. Манна диэн эттэххэ, элбэх улуус­ка, холобур, Хаҥалас, Бүлүү, Ньурба, Сунтаар, Таатта, Мэҥэ Хаҥалас волонтердара бэркэ үлэлииллэрин бэлиэтиэ этибит. Кинилэри үгүстэрин маскировочнай сиэккэни баайарга биһиги үөрэппиппит», – диэн волонтер далбар хотуттар кэпсииллэр.

Барыта кыайыы туһугар!

Уолаттар байыаннай дьайыыттан уоппускаларыгар кэлэ сылдьан хайаан даҕаны бу далбар хотуттарга сылдьан ааһаллар. Кинилэр биһиги волонтердарбыт ыытар көмөлөрүн туталларын кэпсииллэр, махталларын этэллэр.

«Үтүө тылтан, махталтан ордук наҕараада биһиэхэ наадата суох, уолаттарбыт этэҥҥэ, кыайыы көтөллөөх эргилинниннэр эрэ. Байыаннай дьайыы бүтэ охсон, биһиги кэргэттэрбит, аҕаларбыт, оҕолорбут, бырааттарбыт тыыннаах кэлэллэригэр эрэ баҕарабыт. Биһиги бу кэм устата 4 тыһыынча маскировочнай сиэккэ толору кэмпилиэгин оҥордубут. Уолаттар са­­каастарынан биирдиилээн, аадырыстаан баһыылкалары кытары ыытабыт. Олору ЛНӨ, ДНӨ тирэх пууннарын нөҥүө тиксэрэллэр. Уолаттарбыт баһыылканы тутан, үөрэн-көтөн махтанан төлөпүөннүүллэрэ биһигини кынаттыыр. Байыастарбыт инники кирбиигэ дьоруойдуу кыргыһа сылдьалларынан киэн туттабыт. Биһиги бааһыран госпиталга сытар уолаттарга улахан көмөнү оҥоро сылдьар Светлана Диодорова-Лаврентьеваҕа махталбытын тиэрдэбит. Кини «Саха волонтердара» хамсааһыны кытары олус улахан, үтүө дьыаланы оҥоро сылдьаллар», – диэн волонтердар махталларын этэллэр.

Хаартыскалар Вера Егорова тус архыыбыттан.