Кыайыыны уһансыбыт биир дойдулаахтарбытыгар аналлаах күрэх

Кэбээйи улууһун Куокуй нэһилиэгэр Улуу Кыайыы 80 сылынан, Байанай, Аҕалар күннэрин чэрчитинэн «Умнубаппыт. Өйдүүбүт. Махтанабыт» диэн олус тэрээһиннээх күрэх буолан ааста.

Аҕа дойду Улуу сэриитин кыттыылаахтарын сырдык ааттарын үйэтитэн, кинилэр оҕолоро, сиэннэрэ, аймахтара анал бириистэрин туруордулар.

Күрэх сахалыы сиэринэн «Луҥха долгуннара» эҕэрдэ үҥкүүнэн аһылынна, алаадьынан маанылаан көрүстүлэр .

Күрэх кыттыылаахтарын, кэлбит көрөөччүлэри олохтоох дьаһалта баһылыга Павлов Лев Николаевич, сэрии оҕото, үлэ бэтэрээнэ Гуляев Гаврил Тимофеевич, аҕам саастаахтар «Дьоһун саас» түмсүүлэрин салайааччыта Олесова Нина Егоровна эҕэрдэлээтилэр, кыайыыны баҕардылар.

Күрэх кэмигэр итии чэй, аһылык, кофе тэрилиннэ. Күрэхтэһээччилэр сэттэ көрүҥҥэ күөн көрүстүлэр: Бэйэни билиһиннэрии; МЦ 21-12 сааны ыһыы, хомуйуу; ох саанан ытыы; мас хайытан, кутаа оттон,  чэй өрүү; булт сокуонугар боппуруостар; мэһэйдэрдээх эстафета: толору булт тэриллээх 100 м. сүүрүү, сыырдары, дулҕалары туорааһын, пневматическай саанан сыал ытыы.

Бэрт тыҥааһыннаах куоталаһыы түмүгүнэн күрэх муҥутуур кыайыылааҕынан Олесов Руслан Егорович таҕыста. Киниэхэ Албан Аат уордьан кавалера Гуляев Тимофей Егорович аатынан анал бирииһи кини уола, сэрии оҕото, үлэ бэтэрээнэ Гуляев Гаврил Тимофеевич үөрүүлээх быһыыга- майгыга туттарда, ону тэҥэ Берлиҥҥэ диэри хорсуннук сэриилэспит Лукинов Платон Семенович анал бирииһин сэртипикээти туттардылар.

Күрэхтэһии бары кыттыылаахтарыгар сэрии бэтэрээннэрин ааттарыттан оҕолоро, аймахтара, сиэннэрэ анал бириистэри туттардылар: Кыайыыны уһансыбыт биир дойдулаахтарбыт сырдык ааттара: Петров Егор Афанасьевич, Иванов Михаил  Петрович, Иванов Афанасий Николаевич, Соловьев Николай Николаевич, Азаров Афанасий Васильевич, Игнатьев Кирил Иванович, Иванов Василий Данилович, Павлов Дмитрий Павлович, Унаров Кузьма Иннокентьевич, Игнатьев Петр Иванович, Гуляев Алексей Егорович, Игнатьев Андрей Спиридонович, Петров Серафим Афанасьевич, ини бии  Наум, Федот, Прокопий  Спиридоновтар, Сметанин Дмитрий Дмитриевич, Гуляев Афанасий Игнатьевич. Ону тэҥэ байыаннай дьайыыга сэриилэһэ сылдьан олоҕун толук биэрбит «Эр Санаа» уордьан кавалера Семенов Денис Юрьевич аатынан анал бирииһи кэргэнэ Олесова М.Н. туттарда

Күрэхтэһии суолтатын өйдөөн, өйөөн, анал бириистэри туруорбут бэтэрээннэр оҕолоругар, сиэннэригэр, аймахтарыгар махтанан туран, олохтоох дьаһалта аатыттан Л.Н. Павлов эҕэрдэ суруктары туттартаата.

Дьоһун олоҕу олорон ааспыт, сэрии уот кутаатын ортотунан хорсуннук сэриилэспит биир дойдулаахтарбыт сырдык ааттарын кэриэстээн, ытыктаан үйэлэргэ ахта, саныы сылдьыаҕыҥ, үйэтитиэҕиҥ!

Нина Олесова, уопсастыбаннай кэрэспэдьиэн.