Кыайыыны уһансыбыт Сахатаевтар

Сунтаар улууһугар Кыайыы 80 сылыгар, Кыайыыны уһансыбыт буойуттарын үйэтитэн хас да ɵйдɵбүнньүгү туруордулар. «Сомоҕо» түɵлбэҕэ бырааттыы Сахатаевтар ɵйдɵбүнньүктэрэ турда.

Сунтаарга Сахатаевтар аймахтара Ийэ дойду кɵмүскэлигэр улахан суолталаахтар. Уолаттар бары Аҕа дойду сэриититтэн саҕалаан Ийэ дойду көмүскэлигэр, эйэлээх олох иһин турууласпыттара, билигин да туруулаһаллар.

Юрий Сахатаев — эдэр сылдьан Томскайга кистэлэҥ сулууспа саллаата — кыайыыны уһансыбыт аҕатын Уйбааны, абаҕаларын Лэгэнтэйи, Ньукулайы, Сахаары ааттарын, хорсун быһыыларын үйэтитэр сыаллаах олорбут, үлэлээбит түɵлбэлэригэр аймахтарынаан ɵйдɵбүнньүк туруордулар. Улахан уол Иннокентий Алексеевич Сахатаев — Аҕа дойду сэриитигэр «Хорсунун иһин» мэтээллээх, Берлиҥҥэ тиийбит, Германияны, Японияны кыайыы иһин, Варшаваны, Берлины ылыыга уордьаннаах хорсун-хоодуот  эр бэрдэ. Кэлин ɵссɵ «Хорсунун иһин» бастакы мэтээли ылбытын аймахтара архыыптан хойутуу булбуттара үөрүүлэрин үрдэппитэ. Иван Алексеевич Сахатаев «Сэрии кэмигэр килбиэнээх үлэтин иһин»мэтээллээх, Николай Алексеевич Сахатаев — Аҕа дойду сэриитин иккис истиэпэнээх уордьанынан наҕараадаламмыт, Захар Васильевич Сахатаев «Японияны кыайыы иһин»мэтээллээх хорсун буойуттар. Түɵрт уол бары Ийэ дойдуну кɵмүскээн Арҕаа фроҥҥа уоттаах сэрии толоонугар хорсуннук кыргыһан, дойдуларыгар эргиллэн кэлэн араас үлэни кыайа-хото туппуттара, дьиэ кэргэн тэриммиттэрэ. Ону аймахтара, доҕотторо, бииргэ үлэлээбиттэрэ бары бу баардыы ɵйдүүллэр.

«Сомоҕо»түɵлбэҕэ Кыайыы 75 сылыгар кэмбинээт үбүлүɵйүнэн бу тулаһа баар буолбута. Онтон 80 сылыгар Кыайыыны уһансыбыт Сахатаевтар ɵйдɵбүнньүктэрэ ситэрэн биэрдэ. Бу курдук түɵрт буойун аата үйэтитилиннэ. Маны таһынан ɵссɵ биир сэрии кыттыылааҕа, офицер Мелетий Аввакумович Васильев мемориальнай дуоската арыллыаҕа.

Тускулаана ГОРОХОВА-КОБЕЛЬЯНОВА

Хаартыскалар ааптар тиксэриилэрэ